U montri yada ri ka India, u Rajnath Singh daw lai u cha nongbah Moscow, Russia wow sakhi ya ka Victory Parade ka wow man ha ka 24 tarik uni u bnai, kam chibynta yong i lyngkhooh dap snem wa 75 wa jop ya ka thma bah wa ar (Second World War).
Kani ka Parade toh wow sahkynmoo wei wow kynmoo warom ya ki chipai ka Russia wa ki lok yong ka.
Neiliang u montri yada ri (Defence Minister) ka Russia, u Sergey Shoigu da khut sñiawbha u ya u Rajnath cha kani ka Victory Parade.
Kani ka Parade toh kawa jooh pynman khlieh u snem ha ka 9 Naisan tangwa neidaw wa em ka khlam u COVID-19 da kyrriah tarik noh yaka.
Ki chipai ka India na ki le chnat (Tri-Service) wa em 75 ngut toh kiwa kynthup ya ka Army Navy wa Air Force kiwa da poi ki cha Moscow wow chimbynta ha kani ka Parade chirup wa ki chipai kiwi ki ri wa da khut sñiawbha.
Neiliang ki chipai ka India ha kani ka Parade daw yahkhmat da u sahep major ka Sikh Light Infantry Regiment wei kani ka da embynta bha ko ha ka yakhun thma bah.
I daw wa chimbynta ka India ha ka Victory Day Parade toh kam ka dak wow sahkynmoo wei wow lehwarom ya ki mynsien wa chlur kiwa da khlaad ha kani ka thma khamtam ki chipai ka Russia.
