Shillong: Hadien 3 bnai wa da khang smam neidaw ka khlam COVID-19, ka Iewduh ynne ka sngi da sdang ko wow khai im biang hadien wa chah ka sorkar jylla wow wai kamwa 33% na ki dukan kiwa em hapoh yong ka Iewduh, deiwa pyntip wa na 1222 tylli ki dukan daw wai ki deiwa booh jar jiar ka pali.
Ha kani ka sngi sdang wow wai biang yaka Iewduh kawa haap hapoh i pait yong ka Hima Mylliem waka Khasi Hills Autonomous District Council, u Acting Syiem ka Hima Mylliem, u Ainam Manik Syiem deilang wa ki Montri ka Hima da lai sylli ki ya katai ka yaw kawa heh dooh haka jylla.
Neiliang ka Hima da booh ko leh yaki thaw sait-kti ha chwa wow psiah chapoh ka yaw, heiwa da wan leh wow pait da ki pulit u syiem waki Enforcement ka KHADC. Ynne ka sngi neiliang ka Hima Mylliem da khang ko leh ya 2 tylli ki dukan kiwa tyngkheiñ yaki kyndon wa da phah.
U Pa’iem Ainam da ong u wa daw bichaar bniah yaka Report wa ynne ka sngi ya i long i man yong ka yaw deilang waka KHADC, khamtam hadien wa da chem wa em ki kattu katni ki thaw wa khynnia ki khnang wow chim yaki rai wa emkaam, da ong leh wa neiliang ka Hima daw leh ko ya iwa emkaam yow pyndooh yei pynemkaam Plastic.
Neiliang kawi na kawa chong yaw kawa da heh rta da pynsñiaw ko yei kmen wa da yoh biang ya i laad wow wai yaka dukan, deiwa ong leh wa ym em tieñ ko ya i kjut næ ka khlam neibhah ka Iewduh toh ka thaw kawa da im ko la le pateiñ.
Neliang kawi won kawa dai that, da pynsñiaw ko yei sñiawkmen wa da yoh laad wow wai biang yaka dukan, deiwa pynsñiaw leh wa ya kattæ da pyrkhat ym du wow yoh dai yaki mar, tangwa wow pyllait na i phooh langtit wei sih ki mar.
