Ka Hynñiew Trep National Youth Front (Southern Riwar Circle) deilang waka FKJGP (War Jaiñtia Hills), da pynman ki yaka yalang ha Dawki, Community Hall Dawki wow yaklam ya i thmu yong ka sorkar wow wai noh smat yaka khayi khappood lyngba ka Dawki LCS.
Da yoh ya i klam na u Dolloi yong ka Nongtalang Elaka uwa da pyntip wa neiliang yong ka Elaka Nongtalang da dep pynman yalang ki waki Exporter kiwa haap hapoh ka Elaka Nongtalang wei ki da chim ki yaka rai wow sangeh chwa chipor ya i khayi chapoh Bangladesh lyngba ka Dawki LCS katwa ka sorkar ym pu ye ko wow pynbiang yaki kyndon namo ki Protocol wa biang.
Da yoh leh yei klam na u Laitphar Syngkrem uwa man u President yong ka KSU War Jaiñtia Circle uwa da pynsñiaw wa ka seiñ da chim ko yaka rai hapoh ka EC wow pyrchah bait ya i rai yong ka sorkar neidaw wa u khñiang kjut wa tip kam u COVID-19 da poor smat bha u katni.
Neiliang u Secreatary ka Nongtalang Village Court, da pynsñiaw u wa toh u paitlang yaki kyndon khnang wa ki paidbah u chebha ki hajrong ini wei wow pynsñiaw cha ki paidbah, neiliang u waheh chnong ka Darrang, u Secretary chnong Darrang, deiwa emlang u Sordar Raid Mukertila da yieñ ki ha i jooh i yurim wow pyrchah ya i khayi cha Bangladesh katwa ym pu ye ka sorkar wow pynbiang chwa yaki laad yada ya kiwa chong chnong.
Kamtæ haka yalang da chim da kawi ka rai wow dawa sangeh chwa chipor ya ini i thmu khayi ha Tamabil, hadooh wa duna ka khlam COVID-19.
Ka kyrwoh na u Tarson Lymba, President Southern Region (Ri-War Circle).
