Jowai: Ka Jaiñtia Student Union (JSU) da e ko dei thoh cha ka sorkar jylla neidaw wa leh mylliñ ko u e yarap lyngba ka laad yarap wa tip kam ka Ex-Gratia cha ka yung yong ki 6 ngut ki mynsien bru kiwa da khlaad noh neidaw wa baam tit khloo ha chnong Lamin, West Jaiñtia Hills District.
Hajrong ini i jia, u Treiborlang R Suchen, President ka JSU Shillong Circle da ong u wa hei yaklam yong oo wa u waheh chnong Lamin u Golden Gashnga, da khana u wa hadooh katni leh wym em iwon iwon i yarap naka sorkar cha ka yung ki 6 ngut wada khlaad.
Neiliang u Treiborlang da ong u wa hei sakhiat ka sorkar da toh u e yarap ko da daka Ex-Gratia neibhah wa em hok ki u yoh, neidaw wa man i long wa katni ym yohsa kini wow thooh baam da ki jhoor khloo heipor wa kyrdooh wei man leh i por wa khang chnong ha waroh kawi ka ri waka jylla.
Da ong u wa man sakhiat ka khubor wa sñiawsih heiwa napyrdi ki 11 ngut wa yoh kjut nei baam tit, 6 ngut da khlaad noh ki, wei iwa rap sñiawsih chooh chooh wa 5 ngut kiwa khlaad toh kiwa dang chipayu na i jooh i yung wa uwi won toh u chipayu arbei ki nalor wa man ki ki khonswet.
Da ong u wa cha kiwi ki jylla lada em kam ini i jia sñiawsih wa bakla baam yei baam wa em bih, ka sorkar jooh e yarap poisa ko lyngba ka Ex-Gratia cha ki manyung.
Pynkynmoo haroh u wa kam ini i jia wa ya sariem da jia ha East Godavari District, Andhra Pradesh ha u snem 2017 heiwa 16 ngut da khlaad ki neidaw i baam wa man bih, neitæ ka sorkar yong ka jylla Andhra Pradesh da e yarap ko lyngba ka Ex-Gratia hadooh T. 5 lak cha ki manyung wa khlaad.
