Khliehriat: Kiwa yahkhmat yong ka seiñ Meghalaya People United Front (MPUF) San Shnong Circle, haka kyrwoh wa da phah da u President u Juny Phawa, da ong waka seiñ da booh ko ya i kyrpaad joor yaka chnat krehkaam yong ka MeECL wow sñiawbha ko wow kylliang noh ya u chrot bordiñ wa em haka chnong Iongkaluh Dong Rang Masi, East Jaiñtia Hills.
Kamwa man kattæ, utai u chrot bordiñ da pat u lakam wa ar tayaw kattu neidaw wada rim palat u neitæ i daw wym ye de u wow yieñ.
Chooh chooh kani ka dong da sah doom ko kattu la kamwa ar tayaw khlem i bordiñ, ini da booh ko yei eh ya kitai ki dong kiwa yoh bordiñ lyngba utai u chrot bordiñ.
Neiliang ka seiñ da kyntu ko yaki bor watoh u pait wow sñiawbha u chimkhia lang ya ini i kyrpaad yong ka seiñ khlem da pynslem neibynta i bha i miat yong ki paidbah chong chnong.
Hajrong ini, neiliang ka seiñ leh daw booddien ko ya kani ka kaam lada ka MeECL ym leh ko ya iwa emkaam.
