Ka Khasi Students’ Union War Jaiñtia Circle ynnin ka sngi hapoh i yahkhmat u President u Laitphar Syngkrem, General Secretary u Lurman B Talang deiwa emlang u President ka District u Ohibait Dkhar wa u Organising Secretary u Leningrad Tariang da lai yachem ki yaka SDO (Civil) Amlarem Sub Division wow klam sani bha wei wow dawa u pyndam (Delete) ya waroh ki Non-Tribal namo kiwa wym toh ki jaitbru ri-loom kiwa em pyrtuid hapoh ka Electoral Roll hapoh ka 7 Amlarem Constituency.
Ha ini i yachem neiliang ka seiñ da pynsñiaw wa i yoh psiah pyrtuid yong ki baar jylla haka Electoral Roll da booh ko yei maa yaka thaaiñ War Jaiñtia khamtam kitu ki chnong khappood waka Bangladesh neibhah kini kiwa yoh yaki Epic da suba joor wa toh ki nong Bangladesh.
Ha kani ka yaklam da emlang u waheh chnong ka Muktapur uwa da pyntip wa ha kani ka chnong em ki baar jylla kiwa yoh psiah pyrtuid hapoh ka Electoral Roll wei daw pyndam noh yei pyrtuid yong ki.
Neiliang ka SDO da kyntu ko ya ki waheh chnong hapoh War Jaiñtia wa ya kiwon kiwon ki bru kiwa wan na baar ym toh wow pdiang kulmar khlem iwon iwon i pynsakhiat kam ka Police Verification wei wow pynsakhiat leh neiwon ki thaw wa wan ki wa kam kiyi ki jait kaam kreh ki.
Da kular ko leh wow khut ya waroh ki waheh chnong yong ka thaaiñ War Jaiñtia kiwa ki baar jylla yoh ki u psiah hapoh ka Electoral Roll chnong yong ki.
