Jowai: Kiwa chongdai madan ha tymbud rood sarok yong ka Iawmusiang kahamtam kitu kiwa chongdai pyrchah yaka Iawchyiap ynne ka sngi da pynsñiaw ki yei sñiawsih hadien wa syndet syndet ki bor District da wan li beh ki yaki heipor wa dang chongdai, deiwa ong yeini da leh ki khlem iwon iwon i e yutip chwa næ i pynche wot hawa ynne ka sngi toh ka sngi wada pynbait næ da e laad hi ya kiwa dai kutia.
I wan beh ki bor District da antad ki toh heipor 2:30 i sngi wei ong ki da emlang nadooh ki Magistrate ki pulit wa ki bor pynlai chnong ka Iawmusiang, wei da ong ki leh wa heipor wa wan beh da phah ki ya kiwa chongdai wow chong ki ha jar jiar i trep. Booh won ki yei kylli wa kammon u ye wow chong haki trep heiwa tang yaki yaw wa jooh chong ym pu e laad u wai.
Heini i wan beh, da em leh kiwa chongdai wa slem u pyllang yei mar, heiwa da chah rah ki mar yong ki haka kari kawa da wan deilang waki heipor wa wan beh ya kiwa chongdai madan.
Kamtæ hadien ini neiliang kiwa chongdai madan da lai toor ki cha yung krehkaam u Deputy Commissioner, Jowai yow yoh yei pynche heiyatoh wa ini wei wow kyrpaad leh ya oo wow pynsmat u wai yaki yaw yow lait ki nei yap thngan neibhah waroh chi kattu im ja ki deiwa chong dai.
Hei yaklam wa uwi na kiwa chongdai jhoor wa jooh chongdai ha Iawchyiap da ong u wa hei sakhiat lada pynmih ya kawon kawon ka rai leh toh u pyntip chwa khnang wa ki warep leh u dam ki u khait yaki jhoor ki soh neibhah ini i leh ktah haroh ko ya ki warep neidaw wa ki mar man ki ki mar pyut.
“I daw wa kwah i u yachem wa u DC toh neibhah wa i wym em kwah i wow tyngkheiñ aiñ, wei katwon tam kmen i lada bien pathan u DC wow booh da ki aiñ ki kyndon ya kiwa chongdai kamwa leh yaki kari khang yow lait nei kulmar yow man iwon iwon leh iwa lai bait,” ong u Markatjuh Dkhar.
Da pynsñiaw ki leh yei lyngngoh deiwa ong wa ini i rukom wan beh wym em leh deiwa salonsar, heiwa em ki thaw wa beh em won ki thaw wym em beh ki, wei wot kiwa chong pyn haphrang Gate DC leh yoh bait ki u chongdai hadooh wa miet.
Da ong ki leh wa haki sngi wada booh u dai kutia da em leh ki bru wa wan khrong dan iwa da pynsñiaw skem yaki u wanrah yaki mar baam kam ki jhoor ki soh cha yaw.
Kamtæ ha kani ka sngi nadooh i por 3 chipawa da lai ki cha ka yungkrehkaam u DC deiwa angnood wow yoh yaklam wa oo, tangwa da pyntip ki wakreh wa ym toh de i por wow yachem bru, neitæ da yang bait ki ha pchem u DC hadooh i miet yow yoh yaklam heipor wa mih liwan u tangwa wym yoh laad ki.
