Jowai: Hadien wa u sarok ha Jowai uwa pynyabi yaka Loomkyrwiang, Chiliangraij, Chutwakhu waka Aitnar da ngam u haka 26 tarik uni u bnai iwa da pynsuba boi wa pdung ka liar wa em hapoh uni u sarok hadooh wa chlai ka um chajrong sarok, neiliang ka chnat PWD ynne ka sngi da pyntikna ki wa da chem yei daw tre wa jia ini waroh hadien waka rymaw da e laad ko wow pynkreh chna pynmiat.
Kamtæ hadien wa u SDO PWD Jowai South Division u R. Susngi, ka JE ka Velo Sutnga waki wakreh da lai hiar lai pait lai sylli biang ki yow chemtre yei daw wa jia ini waroh, da pyntikna ki wa i daw toh wa u dooid wa wan na Khliehchnong Chilliangraij da kaad u kamwa chiphut chwa u poi haka liar wa em hapoh sarok, heiwa waroh ka um wa wan neiliang yong oo da siam ko chapoh khyndaw wym em de u poi ko ha u Hume Pipe.
“Neini i kaad, ka um da siam ko kylleiñ kylleiñ wei kat dang slem nang paar ko napoh khlem lai de cha u Hume Pipe wei ini nang pynjem ko ya u sarok iwa da leh du ka khyndaw donhi. Kamtæ katwa joor u slap nadooh kini bnai wadep, na ini i daw ngam noh ka khyndaw wei kaad u sarok,” ong ka JE ka Velo Sutnga.
Da khana haroh ko wa nyngkong ym sñiawthooh wa kammon da jia ini neibhah da chem wym em pdung ki Hume Pipe, wei da tih boon thaw yow chem yei tre wei hawa kut manda psiah ki wakreh chapoh u liar wa em u dooid wa wan na Khliehchnong Chilliangraij te chem tre.
Da ong wa kattu neini u chna ya utai u dooid wa kaad yow wan kani ka um ha u Hume Pipe wei lyngba ini yooluti da ye u wanrah yei bha.
