Ki dkhot ka KSU Jaiñtia Hills District Unit hadien wa em wa yoh COVID-19 ha Khliehriat uwa man u Branch Manager ka SBI Khliehriat Branch da lai yachem ki ya u FM Dopth, Deputy Commissioner ka East Jaiñtia Hills District yow yaklam kammon ki laad wow yada nei poor uni u khñiang hapoh ka District.
Ha i yaklam ka seiñ wa u DC da chem wa uni uwa yoh COVID-19 ym em pyntip u cha u DC heiwa ka seiñ da beiñ ko ya uni u wym em kheiñ yaki kyndon wa da booh deiwa sñiawphylla leh kammon lait u naki Check Point Byrnihat hadien wa wan u na Guwahati khlem da bood bniah yaki kyndon yada naka khlam.
Ka seiñ da yoh yutip chooh chooh ko na u DC wa uni u bru toh uwa da chah Test chwa tangwa da lai biang u cha Guwahati deiwa khlem leh Test de ha i por wa wan biang u cha ka jylla.
Ka seiñ da dawa ko wow boodien ya waroh ki bru wa da yachem wa uni u bru wa yoh ya uni u khñiang, u pyndam noh wow e yaka Car Pass yaki baar jylla kiwa wan cha ka thaaiñ East Jaiñtia kamjooh yaki VIP wa ki wakreh yong ka sorkar pyrdi kiwa em hapoh ka thaaiñ East Jaintia Hills.
Ka seiñ da kyntu ko leh yaleh ya u DC wow khang chwa chipor yaka State Bank Of India, Khliehriat Branch.
U DC da ong u leh wa lada uni u wakreh ka SBI chem wa tyngkheiñ u yaka kyndon aiñ, daw pynchitom ya oo katkam ki kyndon ka aiñ.
