Ka Society for Environment Protection and Sustainable Development (SEPSD) da pynsñiaw ko yei pyrchah joor yei thmu ka Ministry of Environment Forest and Climate Change (MOEF&CC) wow pynkylla noh ya ka Environmental Impact Assessment 2006 katkam i pynbna (Notification) kawa mih dang ini wadep.
Haka wyrta wa phah da u President ka SEPSD u Wanbun Dkhar da ong u wa ka yumut cha lyndet ka Ministry wow pynkylla ya ka EIA 2006 toh du i buit wow yoh laad ko wow leh katwa ngait khamtam heiyatoh wa i seiñ ya ki karkhana kiwa heh wei lyngba ini i pynkylla ka sorkar daw yooh ko yei hok ki paidbah, neibhah ha ka Notification EIA 2020 da kdaw leh wa ym emkaam de ya ka Public Hearing namo i pynsñiaw paidbah chwa wow sdang ya kiwon kiwon ki kaam wa heh (Project) wa ki karkhana.
Ka seiñ da ong ko wa kani ka rai da lai lait ko ya ka Environment Protection Act,1986 wei da tyngkheiñ leh ya ka Mandatory Method, Discretionary Method wa Cost Benefit Analysis yong ka Environment Impact Assessment 2006.
Chooh chooh u Wanbun da ong u leh wa ka seiñ ym sñiaw yahaap ko yeini i rai wa jhan ka MOEF&CC wow pynkylla ya ka EIA 2006 neibhah kam ha kini ki por Lockdown boon ki paidbah dang boonkaam ki ha jar jiar ki kaam yong ki wei ym yohpor ki wow e yumut ya ka Ministry kamwa da kdaw ha katai ka Draft wa ka Ministry daw elaad ko yei e yumut kiwon kiwon ki seiñ næ ki bru chemphang wei i por wa da e man i iwa tbian bha katkam wa da booh da ka MOEF&CC.
Kamtæ ka seiñ dadep e dorkhat ko cha ka MOEF&CC wow sangeh chwa u pynkrehkaam ya ka Notification wa thymme wei wow pynyinsur chooh yei por wow pdiang ya ki yumut na ki paidbah neibhah lada kani ka rai krehkaam ko daw wanrah ko hei maa wa khroo neibhah ki Project wa ki karkhana wa heh ye ki wow pynemkaam ya ki marpohkhyndaw kamwa da sakhi ha kini ki sngi wot hapyrdi i bood ya ki kyndon ka EIA 2006 dang yoo chiboon i pynjæd tympra ya ka rymaw da ki karkhana wa heh wei sa katwon chah ktah lada ka sorkar pyrdi pynkrehkaam ko da kani ka EIA 2020.
