Ka Khasi Students’ Union War Jaiñtia Circle ynne ka sngi hapoh i yahkhmat u President u Laitphar Syngkrem, u General Secretary u Lurman B Talang wa u Finance Secretary u Kindly Khyriem da lai ki wow ujor wei wow pyrchah joor ha u Deputy Commissioner, West Jaiñtia Hills District hajrong ka hukum wa da mih wa hap e lang wa u Aadhaar Card hawa yaleh yaka Scheme Pradhan Mantri Awas Yojana (PMAY) wei ki wym em ya u Aadhaar ym yoh ki yani ka Scheme.
I pyrchah yong ka seiñ toh hajrong ka yurim wa u Aadhaar ym pu man u uwa hap u pynemkaam khlem dam (Mandatory) hapoh ka jylla yong i wei ka sorkar ym toh u lai lait ko hajrong kani ka hukum ka bichaar.
Ka seiñ da kyntu ko leh yaka sorkar wa toh u pynmih chooh chooh yaki laad pyntipmit namo ki ID heithaw u Aadhaar khnang wow pynsuk yaki paidbah neibhah wa katni hi, chiboon ki paidbah ym pu pdiang ki ya u Aadhaar.
Ka seiñ da ong ko leh wa ka sorkar ym toh wow pynbor ko ya u Aadhaar wow chon u hei pyrkhat pyrdaiñ wa laitlooid ha uwi pa uwi wa chong chnong yong ka thaaiñ. Ka seiñ ym pdiang ko ya ini wei toh u pynkylla syndon ya kani ka hukum wa toh du lyngba u Aadhaar u yoh ya kani ka Scheme.
Ha i yaklam waka seiñ, neiliang u Deputy Commissioner u Garod L.S.N Dykes da kular u wow phah ya kani ujor cha ka sorkar yow pait bniah ya ini khnang wa ki paidbah u suk ki heiyatoh waka Scheme PMAY.
