Sdang ka lehniam soo sngi le yaw ka Raij Jowai

by Wyrta Staff

July 10, 2016

Reading Time: 3 mins read

Jowai : Ynne ka sngi Pynsiñ ka 10 tarik ki khon ka Raij Jowai da sdang ki ya ka lehniam Behdieñkhlam kawa tip leh kam ki Soo Sngi Le Yaw.

Ynne i sngi ki khon ka raij heipor chiteiñ sngi da sdang ki da ka Siang ka Pha iwa mut wa da e baam e dih ya ki Sangia Saret ki yong ki ha man ki Kmai Yung wa ki Yungblai yong ki.

Hadien wa dep ka Siang ka Pha ki Khon Raij da pyllang paaid ki ha Khliehchnong chwa wow lai lithooh ki ya ka Symbood Khnong.

Chirup wa i ood ka bom, ka bhuri, ka bikur wa ki chæng-chæng ki paidbah kiwa kynthup khynnah wa waheh dei chaad dei kyriaw da lai lithooh ki ya ka Symbood Khnong na Riatturiem.

Hadien ini da rah ya ka Symbood Khnong yow pynpoi ki ya ka ha kjat u Loom Sooiung.