Khliehriat: Heiyatoh wa ki mat dawa yong ki soo chnong yong ka thaaiñ khappood wa kynthup ka chnong Lejri, Lahaleiñ, Huroi wa Hingaria wow e bor ya ki wow psiah noh cha ka ri Bangladesh du neidaw wa chah iehbeiñ wa kamjooh neibynta wym mano ka sorkar jylla wa ka sorkar bei wow pynbiang ya ki kaam pynroi yong kitai ki chnong nadooh u surok, thaw sumaar, ka Mobile Network, ka bordiñ khamtam ya u sarok uwa da iehbeiñ nadooh ki por nachwa hadooh katni khlem pynbha pynmiat ha kitai ki chnong kiwa da maad ya i eh i khoo wa boonjait ha kini ki snem wa dadep heiwa ka sorkar da pynbiej hi-eh ko ya ki paidbah du ki kular khlem ki kaam.
Kamtæ neiliang ka Southern Border Youth Welfare Association (SBYWA), East Jaiñtia Hills District, da pynsñiaw ko yei kyrchaan ya kitai ki chnong khamtam ya ki bynta wa dawa yong ki wow pynbiang ya ki kaam pynroi ha ka thaaiñ khappood tangwa ka seiñ da pyrchah ko leh wow psiah ki cha ka ri Bangladesh neibhah ym em kwah ko wow dooh ya i khyndaw u chyiap yong ka jylla Megahalaya khamtam yong ka Ri Jaiñtia wow yoh mynkna kiwi du neidaw wym mano ki bor ka sorkar wow pynbiang ya ki kaam pynroi ha kitai ki chnong.
Ka seiñ da kwah ko wow khana heini kajiak hakhmat yong ka sorkar wa neiyi i daw wa ki paaid Ynñiawtrep kiwa chong wa sah ha ri Bangladesh ki da im suk im saiñ ki khamtam ha ki liang ki kaam pynroi na ka sorkar Bangladesh da rap pynbiang ko ya ki tangwa ha kani ka ri India won da chah iehbeiñ ki da ki phaw phaw snem khlem em wa pait wa yoo heiwa ka sorkar wa kiwa mihkhmat da kut hei kular hi-eh khlem kiwon kiwon ki kaam.
Kamtæ ka seiñ da kyrpaad ko ya ka sorkar jylla wa ka sorkar bei (India) wow pynbiang wut wut ya ki kaam pynroi yong kitai ki chnong khappood khamtam ya u sarok wa ki thaw sumaar kiwa man hakhmat dooh wei lada ka sorkar ym chimkhia ko ha ki bnai wow wan neiliang yong ka seiñ daw thooh ko ya ki laad ki luti wow sdang da yakhih paidbah wa jai-jai ryngkat ka sur yong kitai ki soo chnong khappood, da ong u S. Shadap, President ka SBYWA.
