Shillong: U montri i chait i khiah ka jylla Meghalaya u AL Hek ynne da booh mooyurim u yow pynku kyrdan yaka Rynjah State Dispensary cha ka Urban Primary Health Centre pyn ha Rynjah State Dispensary hi. Da synran ya u montri da u MLA ka thaaiñ u C. Pyngrope wa u Director of Health Services (MI), u Dr. A War wa kiwi de.
Da mang poisa T. 2.79 Klur neibynta ini wei da booh thong wow pyndep hapoh 18 bnai nadooh wa sdang wow chna.
Hawa e yei klam, u AL Hek da ong u wa kani ka sngi toh ka wow sah kynmoo yaki bru ka Rynjah kamjooh kiwa em marjan. Da pyntip u wa ym toh iwa suk wow chna yaki Primary Health Centres ha ki thaw wa em cha sor khamtam wow pynbiang yaki kyndon wa emkaam, khamtam u yoh thaw, wei du deiwa ya krehlang waroh kiwa embynta, da ye yow pynku kyrdan yaka Rynjah State Dispensary.
U Charles Pyngrope da ong u wa i pynku kyrdan yaka Rynjah State Dispensary daw yarap bha ko yaki paidbah iwa da angnood ki da slem kamjooh ki thaw wa em cha jan, da pynsñiaw u yei sñiawngooh ya ki wakreh ka chnat i chait i khiah yei yaleh pyrchah ki yaka khlam COVID-19.
Ha kani ka sngi da saam leh ya 10,47,654 tylli ki musari cha ki DHMO ka Ri Bhoi District, West Khasi Hills District, South West Khasi Hills District, East Jaiñita Hills District, West Jaiñita Hills District wa East Khasi Hills District kam chibynta ka thong wow pyndooh noh ya i kjut Malaria ha u 2030, wei kani man ko kam chi bynta ka thong ka sorkar pyrdi.
