Ka lehniam Behdieñkhlam kawa da yah na ki warim wajah wow bood ya ki hukum u Trekirot hadooh ynne ka sngi leh dang pteiñ ya chibynta kani ka lehniam ym du ha ki manyung ki thyndai yung hapoh Ri-loom Jaiñtia tangwa wot cha kiwa em cha Ryngkaw Para leh kamjooh.
Ynne ka sngi hapoh i pait i yoo wei i pynlai ka Seiñ Raij Shillong, da sdang yei lai choh thyndai namo i lai e ngooh e dem ha man la ki manyung (Thyndai) kiwa man ki khon ka Niamtre ha kylleiñ ka sor Shillong.
Neiliang ka Seiñ da bhah ko ya ki dkhot yong ka wow lai choh thyndai cha ki palat 200 tylli ki manyung wa em ha Shillong wa kylleiñ yong ka chirup wa ki bom ki bhuri wa i bood ryntih ya ki kyndon wa da booh ka sorkar heiyatoh wa ka khlam COVID-19.
Ynne ka sngi ka Seiñ Raij Shillong hadien wa rai ko wow lai choh thyndai, da bhah ko ya ki bru yong ka wow lai jar jiar ki manyung cha ki thaw wa ki chnong kiwa em hapoh sor Shillong wa kiwi ki thaw.
Da pyntip leh wa ini i lai choh thyndai u man i deiwa bood ya ki kyndon wa da ka sorkar wei u pteiñ i hadooh wa pyndep yei choh thyndai ha waroh ki manyung chwa ka 8 tarik uni u bnai.
