Jowai: Ka Jaiñtia Students’ Union (JSU) War Jaiñtia Circle hadien wa da bichaar bniah da chim ko ya ka rai wow dawa na ka sorkar jylla wow pynku kyrdan noh ya ka chnat PWD Sub-Divisional Office kawa em ha Amlarem cha ka kyrdan Divisional Office (EE Office).
Ka seiñ da ong u wa kamwa da tip lang, ya ka Amlarem Civil Sub-Division da sdang nadooh ka 12 Khonchonlad (Nov) 1976 wei pait ko ya ki thaw ha khappood wa ka thaw khayi wa heh tam ha ka jylla wa khlan i khayi wa ka Bangladesh.
Kamtæ da em hok ko wow yoh ya ki yung krehkaam sorkar wa rap heh khnang wow em i yajan wa ki bru sorkar wa ki paidbah ka thaaiñ.
Da ong ko wa kamwa man katni, ka yung krehkaam ka Divisional Office (EE ophis) em ko ha Jowai ya kawa tip kam ka PWD South Division, wei kani ka Division pait ko ya ki thaw wa haap hapoh ka Amlarem Civil Sub-Division, wei ini da pynchitom i ya ki paidbah nadooh i lai i wan, i por wa i lut i sep. Kamtæ ka seiñ da sñiaw ko wa ka sorkar u pyrkhat noh ko wow e ya ka yung krehkaam Executive Engineer deiwa pynku kyrdan ya kawa em ha Amlarem.
Ka seiñ da ong ko wa ka Amlarem Civil Sub-division toh kawi na kiwa chah iehbeiñ da ki phaw snem wei da neh bait ko kamjooh, ya ka Khliehriat Civil Sub-Division da pynku kyrdan cha ka District, katwa ka Amlarem won da neh ko i jooh.
Heijooh i por da ong ko wa ka sorkar da thmu ko wow rah noh ya ka yung krehkaam PWD North Division na Jowai cha Shangpung kawa em hapoh ka Laskein Block wow pynyajan ya ki paidbah wa ka sorkar, kamtæ ka sorkar ymtoh u leh chiliang ko, wei emkaam leh wow e yei hok neibynta ka Amlarem Civil Sub-Division.
Ka JSU ka kyntu wei da kyrpaad ko ya ki paidbah ka thaaiñ Amlarem Civil Sub-Division nadooh ki para seiñbhalang waphær waphær, ki Waheh Chnong wa ki paidbah wow krehlang neibynta ini.
Kani man ko katkam ka Wyrta na u Eddy Kery Pohtam President ka JSU – War Jaiñtia Circle.
