Jowai: Ha uni u snem uwa man u snem wa em ka khlam u COVID-19 da pynsangeh ya kiwa boon ki lehniam yong ki niam waphær waphær ka pyrthai.
Ha kani ka kynti ka Raij Jowai da yohbor ko na ka sorkar wow pyndep ya kani ka lehniam deiwa bood ya ki kyndon namo ki Standard Operating Procedure (SOP) wow bood khnang wow yada na uni u khñiang.
Ynne ka sngi Mulong man ko ka sngi wa ar yong ka lehniam Behdieñkhlam kawa tip leh kam ki Soo Sngi Le Yaw heiwa ki khon ka Niamtre hapoh ka Raij Jowai da pyndep ki ya ka Kñia Aitnar ha Syiem Aitnar.
Ya kani ka Kñia da pyndep hei step wei neiliang u Dolloi ka Elaka uwa man leh u khlieh ki kaam Niam hapoh ka Raij, u Pyramon Kynjing da ong u wa kñia katkam ki dak ki chin man ko kawa miat.
Hadien wa pyndep ya ka Kñia ki Loom ki Pdeiñ namo ki Dorbar Chnong da pyndep ki yei ngooh i dem ha jar jiar ki Yungwalieh yong ki wow engooh ya ki Blai wei wo paan yei kyrkhu kyrdoh ya ka chnong ka thaw.
Heipor kamwa 1:00 waje i sngi da em i yachem ha Mynkoipyrdi, Loompyrdi Iongpiah heiwa da wan chimbynta da ki kattu katni ngut kiwa chah jied na ki dorbar chnong heiwa da em ka yalang wa tbian.
Ya kani ka yalang da pynlai da u waheh chnong ka Loompyrdi Iongpiah, u A. Ningty wei da yoh ya ki kyntien na u Dolloi, i Ngoohblai wa i Suit i Choor na u Kñia ka Tpep Pale, u EM Passah wa ki kyntien na u President ka Seiñraij Jowai, u OR Challam.
Na Myngkoi Pyrdi da mih wow lai cha Iawmusiang hapoh i yahkhmat kiwa kitkaam niam wei kiwa mihkhmat na ki chnong da lai ki ha ki thaw wa jooh booh ya ki Dieñkhlam ki Dieñ Seh Dieñ Chaan wei neidaw wa ha uni u snem wym em u rah ya ki dieñkhlam, e noh du ya ki kyntien Ngooh Dem ha kini ki thaw.
Manda dep i engooh ha kini ki thaw da wanpoi won ki Khonraij (Chiliangraij) Loom-Sooiung ha i thaw wa jooh pynchong ya ka Khnong Blai wow e ya i ngooh i dem ha kani ka thaw wow paan yei da yei kær wei wow pynwiar noh ya ka khlam u COVID-19.
