Shillong: Ka Hyniewtrep Achik National Movement (HANM) seiñbei ynne ka sngi da klam che ko wow pteiñ yei pyrchah bait ya ki karkhana ‘Coke’ kiwa em ha Shallang, West Khasi Hills District, wei ynne ka sngi ka HANM da pyndam kaam ko leh ya u President ka West Khasi Hills Unit, u Hamar Lyngkhoi hadien wa da dep wow khut hajir haka 4 tarik uni u bnai neiwa leh pyrchah seiñ deiwa kyrchaan ya kitai ki karkhana.
Hawa klam wa ki laad pathai khubor, u Chairman ka High level Committee yong ka HANM, u Arphul Kharbani da ong u wa hadien wa da bichaar bniah ya i leh yong u President ka Wesk Khasi Hills, ka seiñ da rai ko wow pyndam noh na i kaam katwa dang lai ka takit da ka seiñ hajrong i rai samen u Hamar Lyngkhoi.
Da pyntip u wa ha i takit ka seiñ, u Hamar da phla u wa da soi u yaki kot ki sla wow dam noh i pyrchah yaka karkhana Coke ha Shallang neibhah wa kyrpaad kiwa pynlai kitai ki karkhana, deiwa pynrap leh wa ya kani ka kaam da soi samen da u President ka WKH khlem da tip ka seiñ.
U Arphul da ong u wa ka HANM u pyrchah bait ko ya kitai ki karkhana neibhah wa ktah ko yaki paidbah ym du haka thaaiñ wei ha ka jylla waroh kawi, deiwa ong leh wa i em kitai ki karkhana da pynman bih ko yaka rymaw, wei da pynkharoi ya ki baar jylla wym ye de wow tipmit kiwa ye wow wanrah yei maa yaki tre chnong.
Neiliang u President ka HANM, u Lamphrang Kharbani da ong u wa ka seiñ ka ym em yutip ko wow dam noh wow pyrchah yaki karkhana Coke ha West Khasi Hills, tangwa ya kani ka kaam da leh du da u Hamar Lyngkhoi, deiwa ong wa ka seiñ da hap ko wow chim rai deiwa eh pyrchah ya u Hamar, neibhah ini i leh samen u ktah ym du yaka seiñ hadooh yaka ri wa ka jaitbru heiwa da pyndooh nong ya ki khynroo ka jylla.
U President ka HANM seiñbei da maham u leh ya kiwi ki dkhot wym toh u chim rai samen khamtam ha ki kaam wa ktah yaka jaitbru.
