I dawa wow kyrriah yaka PWD (Roads) North Division kawa em ka Headquarter ha Jowai cha Shangpung dang pteiñ chooh chooh i heiwa nei liang ki Waheh Chnong yong ki phra chnong kiwa em marjan yong ka Shangpung kam ka Pasyih, Kyndongtuber, Pammanik, Mynso A, Mynso B, Myntkung, Mynskiah Thymme wa Khliehumbuit da pynhær ki yaka chithi yonglang cha u Deputy Chief Minister u P. Tynsong wow dawa naka sorkar jylla wow pynkrehkaam noh yaka hukum wa da dep pynbna nadooh u Kmaichonglad (Dec) 2018.
Kini kiwa yahkhmat ya kini ki chnong da thoh ki cha ka sorkar wa i daw wa dawa ki wow rah ya kani ka yungkrehkaam ka PWD cha Shangpung toh yow pynjan cha ki paidbah yei krehkaam wa rap bha chooh chooh neibhah i thaw wa toh u pait kani ka Division man ki du ha ki chnong kiwa haap hapoh ka 3 Raliang wa 4 Mowkaiaw Constituency wei waroh haap ki hapoh ka Laskein Block.
Kamtæ da ong wa deiwa booh ya kani ka yungkrehkaam ha Shangpung, daw pynjan wei pynsuk ko ya ki paidbah wow wan emkaam kamjooh leh yaki wakreh rap jan ki u lai pait yaki sarok. Neiliang kini ki Waheh Chnong da dawa joor ki yaka sorkar wow pynkreh kaam noh smat smat wow kyrriah ya kani ka chnat na Jowai cha Shangpung kamwa da dep rai wei pynbna nachwa.
Da pynsñiaw leh wa kini ki Waheh Chnong kyrchaan ki yei jooh iwa da dep dawa ka Synjuk ki Waheh Chnong Shangpung, ki seiñbhalang wa ki paidbah yong kani ka thaaiñ.
Kani toh ka wyrta na u Shiwa Siangshai Waheh Chnong Kyndongtuber neibynta ka Synjuk ki Phra Chnong yong kani ka thaaiñ.
