Jowai: Ynnin ka sngi ka Dorbar Chnong Mukhap da pdiang sñiawbha ko ya ki khon ka chnong hadien wa pyndep ki ya ka Quarantine wa 28 sngi heiwa da pynman ya ka yalang wa tbian hajrong ini dei sñiawngooh ya kini ki khynnah kiwa da ksohkti wa ka chnong deiwa bood leh thij ya ki kyndon wa da booh ka sorkar.
Ha kani ka yalang da emlang leh u Waheh Chnong, Secretary VDP, ki dkhot ka SHG, ki ASHA, wa U BDO ka Laskeiñ Block.
Neiliang u Secretary ka VDP da pynsñiaw u yei sñiawngooh wa ki khon ka chnong da lait ki na ka u COVID-19 deiwa kyntu leh ya ki wow man ki kam ki nongmuna wei wow bood ryntih leh ya ki aiñ ka sorkar.
Neiliang u Waheh Chnong da ong u wa hadien wa ka pyrthai da dap ko dei tieñ ya ka khlam u COVID-19 ka Dorbar Chnong chirup wa ki VDP, ki ASHA, ki SHG da ye u pynlai bait ya kani ka kaam. Da ong u leh ya kini ki khynnah wymtoh u sñiawphær ki ya i por wa wan ki na ki thaw wa em ki da hap khang chongkset ya ki kam ha patok tangwa ini man i neibynta i bha i miat ya ka chnong kamjooh ya ki leh.
U Baitlut Langstang uwa man uwi na ki khynnah wa da chongkset da ekhublei u ya ka Dorbar Chnong wa ya ki ASHA wa da kreh ki na mynsien wow pynbiang ki ya ki heipor wa em ki hapoh Quarantine, wei kam i dak sñiawngooh da e sñiawbha da ki tiar cha ki ASHA, SHG, Secretary VDP wa u Waheh Chnong.
Neiliang u BDO ka Laskein, u Brightstar Langbang da pynsñiaw u yei kmen wei yaroh ya ki khynnah kiwa da man kiwa ngaitsneiñ.
Heijooh i por leh da ekhublei u ya waroh kiwa em hakhmat namo ki ‘Frontline Workers’ kiwa da yakhun ya ka khlam u COVID-19 deiwa pynrap leh wa i yakhun ympu kut i wei emkaam wow man kiwa yaichah deiwa bood thij ya ki kyndon wa da booh ka sorkar heiyatoh wa kani ka kaam.
