Kiwa yoh COVID-19 hapoh Meghalaya da em sa 10 ngut hadien wa da pynbna nyngkong ya 3 ngut chwa kiwa kynthup ya 1 BSF wa 2 ngut kiwa liwan na Bihar wa Delhi cha Shillong.
Ki 10 ngut kiwa dang yoh toh 9 ngut ki BSF hi kiwa em hapoh East Khasi Hills wa 1 wa liwan na Delhi cha Shillong kiwa da pynpoi ya waroh kiwa dang em ya u COVID-19 cha ka 67 ngut, heiwa da chait 45 ngut wa 2 ngut kiwa yap iwa da poi waroh 114 ngut.
Neiliang u montri rangbah hawa yaklam wa kiwa pathai khubor ynne i janmiet da ong u wa ym em man chngaaiñ yeiwa ku ma ku kiwa dang yoh COVID-19 tangwa da ong u wa ki paidbah ym toh u tieñ u hær’ngu ki neidaw waka sorkar booddien ko thij pa thij.
Da ong u wa kiwa yoh COVID-19 hapoh ka jylla em ki 4 jiat kiwa nyngkong toh ki BSF kiwa boon dooh kiwa yoh wei ka sorkar da dep ko wow yachem wa ki heh ka BSF yow pyntikna wa ym poor uni u khñiang deiwa pynkrehkaam leh yaki Containment Zone.
Ki wa ar kiwa yoh COVID-19 toh kiwa liwan na baar jylla heiwa da ong u wa ka jylla Meghalaya em ko kiwa khor dooh ki kyndon hawa psiah chapoh ka jylla.
Ki wa le kiwa yoh COVID-19 toh kiwa em haki bynta khappood kiwa yajan waka Guwahati wei ha ki bynta khappood waka Khanapara da booh hapoh ka Curfew waka Lockdown.
Ki wa soo toh kiwa lai khawai bia ha Greenwood Resort heiwa da chem ya 2 ngut kiwa yoh COVID-19 wei kiwi won toh kiwa man Negative namo kiwa ym em chah ktah hadien wa Test ya ki.
Chooh chooh da ong u wa yaki chipai, ki wakreh Bank, kreh bordiñ, ki wareh sorkar kiwa wan na baar jylla ym em khang yaki neidaw waka sorkar pyrdi chah ko ya ki tangwa ka sorkar jylla da pyntikna ko wa kini leh bood ki yaki kyndon.
Neiliang u Conrad da ong u wa ki paidbah toh u em ki yei kitkhlieh wei wow ya krehlang deiwa deiñ yaki Mask, u bood yaka Social Distancing, u dam wow mynthu haki thaw paidbah wei ka sorkar da rai ko leh wow daiñkuna T. 500 ya kiwa leh pyrchah wa T. 1000 ya kiwa tyngkheiñ biang yaki kyndon. Da ong u leh wa ini ym toh wow chna poisa, wei toh i thmu wow pynchlur yaki paidbah wow myllieñ ya kiwa bha.
Da pynkut u deiwa ong wa ka sorkar chimkhia bha ko ya kiwa tyngkheiñ yaki kyndon khamtam ha kini ki por wa em ka khlam.
