Ka Meghalaya Human Rights Commission (MHRC), Shillong wa khlieh da u Justice T. Vaiphei kam u Chairman da chimkhia ko ya kawi ka khubor wa mih ha ka 07-07-2020 heiwa da beiñ kawi ka kur ya ki thaw sumaar hapoh jylla.
Kani ka kur toh ka Kur Khyndeit Pyllun heiwa kawi ka kynthai wa punkhon da phah lai ya ka na kawi ka thaw sumaar cha kawi wei da chah kyntait ko ha kini ki thaw sumaar kam ha ka Nongpoh Civil Hospital, H. Gordon Robert Hospital, Nazareth Hospital ha ka Bethany Hospital (Shilling wa Nongpoh) wei neini da kha khon noh ko hapoh ka kari 108 Emergency Services Ambulance.
Ini i chah kyntait ko da tyngkheiñ i ya ka kyndon Article 21 ka riti synchaar ka ri neibhah da ktah i yei yap i im ki bru hapoh ka ri.
Ka ‘Right to life’ namo i hok wow im man i chibynta yong ka Fundamental Right wei toh i kaamram ka jylla wow pynneh yeitæ wei neiliang ka MHRC da phylla ko wa neiyi i daw wa kyntait ki thaw sumaar wow pdiang ya kani ka bru khamtam ha ki thaw sumaar sorkar.
Neiliang ka Commission da paan ko ya ka bui (Report) na u Chief Secretary ka jylla heiw neiyi i daw wa chah kyntait ka manbei ha ki thaw sumaar sorkar kam ka Nongpoh Civil Hospital wa ki yong ki bru samen.
