Shillong: Kiwa yahkhmat yong ki jait niam waphær waphær hapoh ka jylla, ynne ka sngi da chna ki da ka wi ka kynhun neibynta wow ya pyrkhat kammon wow lai chakhmat næ wow e yumut hawa yatoh wa i chakri ki kynhun niam kiwa em ha ka jylla khamtam hadien wa ku kiwa yoh COVID-19, wei kamjooh ya ki laad wow ye u wai noh ya ki thaw mane Blai.
Uwa mihkhmat na ka Central Puja Committee, u Naba Bhattacharjee da pyntip u wa ka yalang kawa man ynne ka sngi da rai ko wow yang chwa sa chibnai ya ka rai wow wai ya ki thaw mane Blai, deiwa bichaar bniah ya i ku kiwa yoh ya u COVID-19 ha ka jylla.
Da ong u wa ka yalang wa da khut da ka Khasi Jaiñtia Church Leaders Forum da chna ya ka kynhun kawa em 9 ngut ki dkhot, wei kani ka kynhun daw yatai sani bha ko kammon wow e yumut ya ka sorkar heiyatoh wow wai noh ya ki thaw mane Blai hapoh ka jylla, hanla ka jylla sakhi ko yei em kiwa chah ktah ha ka khlam.
U Rev. ET Kharkongor uwa man u Pastor ka Balang Presbyterian da ong u wa kani ka kynhun u pynyoo yei man ya tylli ka wi wow e kyrmen ya ki paidbah kiwa em ha ki jait niam waphær waphær.
Da ong u wa i yaklam man ko leh neibynta wow wai yaki thaw mane Blai, tangwa ki yalang niam boon paaid da yatai wa toh u yait ki, wei da rai leh wow yang chwa hadooh wa kut uni u bnai, tangwa kamwa man kattæ kiwa yahkhmat niam ym pu chim rai wow kyrpaad ya ka sorkar wow wai noh ya ki thaw mane Blai ha ka jylla.
