Ynne ka sngi ka JSU Laskien Block Circle hei ya emlang u President u Dapmain Suchiang deilang wa u General Secretary u Franky Shylla da lai yachem ki ya u Deputy Commissioner yong ka West Jaiñtia Hills District wow ujor hajrong i khayi dieñ pyrchah yaka aiñ da ki kharhana ah dieñ (Saw Mill).
U Dapmain Suchiang da ong u wa kini ki thaw ah dieñ kiwa em hapoh ka Block Laskien palat spah tylli ki wym em ki kot ki sla kiwa biang katkam i chem wei takit ka seiñ wei ka seiñ da pynsñiaw ko ha u Deputy Commissioner wa kammon ki truck da lait ki wow challan ya ki dieñ chadooh Assam kam cha Guawahati, Silchar wa Malidor khlem da biang ki kot ki sla wa paka wei da chem wa pynemkaam ki da ki Essential Commodities Transit Pass wa kam ki Cement Challan khlem da bna yei chait i khiah hawa nang joor ka khlam COVID-19 khamtam ha ka jylla Assam.
Ka seiñ da ong ko leh wa da tyngkheiñ leh yaka Night Curfew wa da booh da ka sorkar, wei ini i leh stiñ yong ki chnat wa toh u pait da pynchlur pathan ya kini ki bru wa chim kabu wow leh ya ki kaam wei ka seiñ da yoo ko yei ujor na kiwa chong chnong wa kini kiwa yah kari liwan ki cha ki chnong khlem da burom ya ki aiñ wei da chong dihcha bamja khlem da bna wow leh yaki laad yada na uni u khñiang iwa da pynchongsier ya kiwa boon kiwa chong chnong kiwa em hapoh ka Laskien Block wa ka jylla hi waroh kawi.
