Jowai: Neiliang ka chnat puræ puthi ka jylla lyngba u D.P. Wahlang, Principal Secretary to the Govt. of Meghalaya, Education Department da pynmih u ya ka hukum wow bood ki College wa ki skur heipor wa e ya ki Admission.
Da hukum ka sorkar wa waroh ki Admission Form ya ki khynnah toh u e Online wei mynkna.
Hawa ekti (Submission) ya ki Form toh u chah du 200 ngut ha ka chi sngi heiwa emkaam u booh ya san tylli ki thaw wow chim Form hapoh u pood ka College; iwa mut 40 ngut ha iwi i thaw.
Lada jia wa duna ki wakreh da phah wow pynemkaam da kiwa sikai wa kiwi kiwi yow pynsmat ya ka Admission.
Neiliang ka chnat daw pynmih ko leh ya ki hukum neipor cheipor.
Emkaam leh wow booh yei por wow wan ekti ya ki Form wei wow chah du samen donhi kiwa wan ekti ya ki lada ki khynnah namo kiwa lai ekti neibynta yong ki.
Chooh chooh da ong wa emkaam wow booh dak ha khyndaw iwa jngai 1.5 meter iwi na iwi khnang wow leh ya ka Social Distancing wei ymtoh u chah ya ki bru wow psiah hapoh u pood ka thaw puræ khlem sap Mask.
Emkaam leh wow leh ya ka Thermal Screening ya waroh kiwa wan ekti ya ki, kamjooh leh wow booh ya ki Hand Sanitizers wa ki thaw sait-kti.
Heijooh i por emkaam leh wow booh ya ki Mobile Number wa E-mail ID khnang wow ye u e yutip cha ki khynnah lada chah jied ki.
Wow bood ya ki kyndon ka Social Distancing ha ki thaw psiah, ki thaw puræ ye ki wow paan yarap na ki bor sorkar wei heiyatoh wa ki pyrtuid ki khynnah wa chah jied emkaam wow booh ha ka website ki thaw puræ.
