Kiwa dang em ya u COVID-19 hapoh ka jylla da ku ko cha 124 ngut deiwa em sa 3 ngut ki BSF wa yoh COVID-19 kiwa em ha Tura kiwa na Assam, da pyntip u montri i chait i khiah ka jylla u AL Hek ynne i janmiet nalor ki 26 ngut kiwa da pynbna chwa ha Shillong ynne.
Kiwa dang em ya u COVID-19 hapoh ki District ka jylla man ki kamni ha wah:
East Khasi Hills- 102 ngut kiwa 91 ngut ki BSF kiwa 90 ngut ki chynrang wa ka wi ka kynthai, ki Air Force 2 ngut ki chynrang, ki bru paidbah 9 ngut kiwa 5 ngut ki chynrang wa 4 ngut ki kynthai.
Ri-Bhoi- 15 ngut kiwa 9 ngut ki chynrang wa 6 ngut ki kynthai.
West Garo Hills- 6 ngut kiwa 5 ngut ki chynrang wa ka wi ka kynthai
East Jaiñtia Hills- 1 u chynrang
Kiwa chait dang neh hi ki 45 ngut, kiwa da dep Test da em 22,944 tylli ki Sample wei dang yang yaka Result yong ki 253 tylli.
Kiwa da liwan chapoh ka jylla da em ki 21,184 ngut.
Neiliang u symbood montri rangbah u Prestone Tynsong da pyntip u leh wa da pynman yaka Ftr HQr BSF Campus, Umpling kam ka Quarantine Zone heiwa ym em wow yoh u mih u psiah u mih cha kani ka Campus wei kiwa yah kari kiwa wan booh ya ki mar wa emkaam daw hap ki wow sap yaki PPE na khlieh ha kjat.
Ya ki bynta won wa em cha Umpling, Rynjah, Nongmynsong wa Mawpat daw sdang wow leh yaka Random Sampling nadooh mynstep ka 11 tarik yow pyntikna wa ym em poor uni u khñiang chapoh ka chnong ka thaw.
