U Commissioner & Secretary ka sorkar Meghalaya u Sampath Kumar, IAS da thoh u cha u Inspector General ka Boder Security Force (BSF), Frontier Headquaters, Meghalaya Umpling Shillong ynne ka sngi yow pynbait hei wow kdoh u khoom yei poor u khñiang khlam COVID-19.
Neiliang ka sorkar da ong ko wa da sñiawkhia bha ko ya ini yoh COVID-19 ki chipai ka BSF khamtam kitu kiwa liwan chapoh ka jylla wei ka DC ka East Khasi Hills da pynman ko ya kani ka BSF Campus kam ka Containment Zone yow lait kiwon kiwon wow mih næ wow psiah chapoh kani ka thaw.
Da phah ya u IG ka BSF wow chna yaka Internal Medical Committee ka wow ya krehlang waka State Health Department wei kani ka Committee daw thooh bniah ko ya kitu kiwa em hei maa wa em hapoh kani ka thaw.
Da phah booh leh yei thaw wa kyrpang du neibynta ki bru wa yoh ya uni u khñiang.
Heiyatoh wa kiwa liwan neini chakhmat, daw hap ki wow leh yaka Quarantine wa 14 sngi haki thaw wa da pynkhreh daka sorkar, lane ha ki thaw wa da pynkhreh wow leh Quarantine deiwa booh yaki haki kamra wow em ki samen samen hanla man kiwa Positive lane kiwa Negative. Wei daw Test yaki hadien 5 lane 7 sngi wei chong haka Result daw phah won yaki cha ki thaw wa em ki BSF yow leh biang yaka Quarantine lane ye ki wow neh pyn haki thaw leh Quarantine wa da em chwa ki.
Waroh kiwa liwan hap ki wow Register chwa wow psiah ki chapoh ka jylla.
U IG ka BSF hap u leh wow e yei pyrtuid yong ki waroh kiwa da liwan ha kini ki 14 sngi, kamjooh katwon ngut kiwa da dep Test wei katwon ngut kiwa dang sah wow Test.
