Jowai: Ka sorkar neipor cheipor da pymmih ko ya ki kyndon wa ki hukum hajrong i yakhun pyrchah ya ka khlam COVID-19 wei da pynjoor ko leh u sylli ya ki bru kiwa psiah namo lai lyngba ka jylla khamtam na jylla Assam kawa man kawi na ki jylla ha ka thaaiñ mihsngi kawa da chah ktah joor bha ha uni u khñiang heiwa ki bru wa psiah emkaam ki wow Register wei wow paan bor na ka sorkar chwa u psiah chapoh jylla.
Iwa phylla dooh wa hapyrdi ini i booh kyndon wa i pynkhor ya i psiah i mih ki bru, ynnin i step syndet syndet da wanpoi syndet uwi u bru na Silchar cha Amlarem, West Jaiñtia Hills khlem i tip ki bor chnong wa ki bor sorkar.
Katkam ki yutip wa tikna wa da yoh, da ong wa uni u bru ya uwa tip pyrtuid kam u T. Sinha wei em kurim u wa ki khon kiwa sah ha Amlarem wei toh uwa khih khayi pateiñ (Business) wei da liwan u cha Silchar nadooh u Thohlakhmi (February) uni u snem chwa ka Lockdown.
Da ong wa u Sinha da wanpoi u ha Amlarem ynnin i step heipor kamwa 3:30 wei neiliang ka kurim yong oo da pyntip ko ya ki bor chnong wa da wan u kurim ko cha yung wei neiliang ki bor chnong won da pyntip ki cha ki bor sorkar hajrong ini.
Mar ya tip yeini neiliang ki bor sorkar da wanpoi ki cha kani ka thaw heipor kamwa 11:00 waje i sngi wei da wan thooh noh ya u Sinha da ki bor ka chnat i chait i khiah wow leh yeiwa emkaam wei hadien ini da libooh biang oo cha Amlarem wow chong-kset (Quarantine) ha Community Quarantine Center ka chnong katwa ka kurim wa ki khon yong oo da chong-kset ki pyn ha yung yong ki hi.
Neiliang ki paidbah ka chnong, dei mynsien wa kusa da ong ki wa ini pynyoo i wa tlot i rukom krehkaam ka sorkar neibhah uni u bru da yait u ya ki kyndon sorkar iwa da booh ya ki paidbah hei maa deiwa lai lait u ya ki kybdon ka sorkar (khamtam khlem ka Quarantine).
Hawa yaklam wow DC ka West Jaiñtia Hills, u Garod LNS Dykes da ong u wa hajrong ini i jia mar ya yoh yutip da phah ya ki sahep sorkar ka District wow leh yeiwa emkaam.
Hejrong i pynbaad wa tyngkheiñ u Sinha ya ki kyndon sorkar, neiliang u DC da ong u wa da phah ya ka ADC wow takit ko hajrong ini wei lada chem wa da tyngkheiñ u ya ki kyndon ka sorkar neiliang ki bor District leh daw leh ki yeiwa emkaam pyrchah ya uni u bru.
