Khliehriat: Haka yalang yong ki soo tylli ki seiñbhalang kitæ ka Southern Border Youth Welfare Association (SBYWA), Jaiñtia Student Movement (JSM), Jaiñtia Youth Federation (JYF) waka North East Indigenous People Federation South Eastern Border Region (NEIF-SEBR) ryngkat wa ki soo chnong kitæ ka chnong Umsatai, Ladwahwapung, Pynurkba, Deiñsatlang kawa da man haka 11 tarik uni u bnai, haka yalang kini ki soo seiñ waki soo chnong da rai da kawi ka sur wow pyrchah ko ya kani ka karkhana (Coke Plant) kawa em ha Wah Deiñling kawa em hapoh u pood u ang yong kitai ki soo chnong.
Ha kani ka yalang da chna leh yaka Joint Action Committee (JAC) kam chibynta wow pyrchah ki ya kani ka karkhana kawa em ha Wah Deiñling.
Ha kani ka sngi da yoh laad leh wow thung ya kiwa kitkaam kani ka JAC heiwa ya u Chairman da jied ya u Shnalad Rymbai uwa man leh u President yong ka JSM-ER, u Secretary da jied ya u N.L. Talang uwa man leh u General Secretary yong ka Seiñ (SBYWA) wa kiwi kiwi.
Hadien ka yalang u Chairman yong ka JAC u S. Rymbai hawa klam wa kiwa thoh khubor, da ong u ka yurim hi wa da chna ya kani ka JAC toh wow yaleh pyrchah katwa ye wow pyndooh jait ya kam kani ka jait karkhana wow em cha kani ka thaaiñ kawa pynsih yaka rep ka riang, ka la-ær, ka um baam um dih, kamtam ya i chait i nang hi yong waroh, neibhah kiwa chong chnong kiwa im ha kitai ki thaaiñ toh kiwa im hei rep hei riang donnhi, neitæ i daw manda em kani ka karkhana daw pynmih ko chiboon ki la-ær wa sih kawa daw ktah ya i chait i khiah wa yaka rep ka riang yong kitai ki bru wa im cha kitai ki thaaiñ.
Da ong chooh chooh u ka JAC da rai ko wa ha kini ki kajiak sngi wow wan kiwa yahkhmat ya kani ka JAC daw lai yachem ko ya u CEM yong ka JHADC, da ong u leh ka JAC daw paan pynche ko wa ha kawon ka yurim wa pynlait ka JHADC lyngba ka Executive Committee yong u Thombor Shiwat yaka NOC wow chna ya katai ka karkhana ha katai ka thaaiñ soo chnong hadien ka ujor wa da booh haka 24-02-2020 daki ar tylli ki seiñ wa kynthup yaka SBYWA waka JYF deilang wa ki paidbah kitai ki soo chnong ka JHADC heiwa da e pathan yaka NOC haka 03-03-2020, khlem da ap chwa yaka sur yong ki paidbah katai ka thaaiñ.
