Ka Federation of Khasi Jaiñtia and Garo People’s (FKJGP) Laskeiñ Circle da dawa ko na ka sorkar Meghalaya Democratic Alliance (MDA), hapoh i yahkhmat u Conrad K Sangma kam u Montri Rangbah, wow pynkrehkaam noh ya ka yung krehkaam ka PWD Shangpung Division katkam wa pynbna (Notification) wa da pynmih nadooh ka 20 tarik, Kmaichonglad, 2018.
“Kamwa man katni ka sorkar jylla yohthiah ko wow pynkrehkaam ya kani ka Division neibhah wa ki yung krehkaam, ki Quarter sah ki wakreh dadep chna liang wanang wei sah du wow pynkrehkaam noh ya kani ka yung krehkaam,” da ong ka seiñ.
Ka seiñ da kylli ko neiyi i daw wa ka sorkar jylla pynslem ko wow pynkrehkaam ya kani ka Division deiwa pynche ya ki paidbah wa manda kyrriah ya kani ka Division u krehkaam ko du ya ki ar tylli ki Constituency, (Raliang Constituency wa ka Mookaiaw Constituency) wei ym ktah i ya ka Constituency u MLA ka Jowai u Wailadmiki Shylla deiwa burom leh ya oo uwa da kyntu wow chna næ pynmih noh da kawi ka yung krehkaam wa thymme.
“Lada chna thymme leh u man ko i jooh lada kyrriah leh u man ko i jooh neibhah kani ka North Division u pait ko du ya ki ar tylli ki Constituency. Lada pynku kyrdan ya ka cha ka Division leh daw haap pait ko ya ki ar tylli ki ki Constituency. Lada chna Division thymme, ka North Division ym em hali de ko wow rep u riang wei daw man i kam wow pynsepai donhi ya ka poisa paidbah khlem kreh. Katwa kamtæ iyi u eh ya u Wailadmiki Shylla wow pdiang ya ini,” da kyntu ka seiñ.
Da kyntu ko leh ya u Wailadmiki wa ymtoh u ap u du ya ki wakreh ka Division kiwa ym kwah wow lai kreh chawi wei lada ym kreh næ ym bien ki wow lai kreh chawi ka seiñ daw thoh ko cha ka sorkar wow pyndooh kreh noh ya ki wei wow thung da ki bru kiwa bien wow lai kreh kat chawa em ki thaw wa phah ka sorkar.
Chooh chooh da e nongmuna ko wa ya ka NEC Division kawa jooh em ha Jowai da kyrriah noh cha Khliehriat neibhah wa haap pait ko ya ki ar Constituency (Khliehriat Constituency wa ka Sutnga Constituency) wa ka Shillong North Division leh da kyrriah cha Nongpoh Division wa ka Nongpoh Division cha Umsning Division wei kini waroh katni em ki ha ki thaw wa toh u em ki wei hadooh katwon daw pynsuk ko ya i emkaam ki paidbah ha kiwa boon ki liang.
Ka seiñ da kyntu ko leh ya u MLA ka Jowai wymtoh u tieñ u ya rem Election u neibhah ki kaam yong oo daw klam paidbah ki lada kreh hok daw jop biang sa chisien.
“Hei sakhiat u MLA toh u dawa u na ka Sorkar wow kyrriah noh ya ka North Division ka wym em yumut wei ka wym yohnong iwon iwon ya ka constituency yong phi wei da toh i por ya phi wow wanrah noh da kiwi ki yung krehkaam waphær waphær ha i thaw ka North Division kawa em ha Jowai neibhah kamwa man katni em boon ki chnat kiwa em ha Jowai kiwa dang sah yungwai kam ka DMR, ka Income Tax, ka Labor Department wa kiwi kiwi khnang wow man i ka kyrkhu wei myntoi ya ka Constituency yong phi,” da kyntu ka seiñ ya u MLA ka Jowai.
Ka FKJGP Laskeiñ Circle da kyntu ko leh ya waroh wow ksohkti lang ha ini i dawa neibynta i myntoi kiwa boon walang.
Kani man ko kam ka Wyrta na u Kermiki S. Passah, Organising Secretary ka seiñ.
