Ka chnong Sohphoh, kawa haap hapoh ka West Jaiñtia Hills District, Meghalaya da dep pynthymme biang ko ya kiwa kitkaam chnong yong ka haka 4 tarik uni u bnai. Heini i pynthymme ya kiwa kitkaam da pynman da i thap Vote yow jied ya u Waheh Chnong neibynta u snem 2020-2022.
Heiyatoh wa ini i jied waheh chnong da wan wow pynlai da u Dolloi ka Elaka Nartiang u H. Dhar wei da wan chim wynta lang da waroh ki manyung yong ka chnong Sohphoh. Ha kani ka sngi jied waheh chnong da bood pynrkhiñ bha ya ki aiñ ki kyndon katkam wa da booh da ka sorkar lyngba ka chnat yong ka Health and Family Welfare.
Hadien wa dep niaw yaki Vote ha ka jooh hi ka sngi, da pynbna ya Mutshwa Thabah kam u Waheh Chnong wa thymme yong ka chnong Sohphoh. Ya kiwi tawon ki Executive Member da jied wei wa da pynskem yaki ha ka 11 tarik uni u bnai.
Kiwa kitkaam wa thymme man ki u Mutshwa Thabah (Waheh Chnong), u Kishon Kharsahnoh (Asst. Waheh Chnong), u Jameris Suting (Chairman), u Rison Talang (Vice-Chairman), u Foster Kharsahnoh (Secretary), u Phristar Suting (Asst. Secretary) wa u Teibor Suting (Treasurer).
Da thung leh kamwa 20 ngut ki Executive Member kiwa kynthup ya ki waheh, ki manbei wa ki khynroo khyllood yow man ki kam kiwa saiñdur nei wynta i bha i miat, i chongsuk chong saaiñ wa i roi i paar yong ka chnong ka thaw.
Ka kyrwoh na u Mutshwa Thabah, Secretary warim heijooh i u waheh chnong wa thymme ka chnong Sohphoh.
