Ka KSU Jaiñtia Hills District Unit, ynin ka sngi ka 14 tarik da lai yachem ko ya u Deputy Chief Executive Member ka Jaintia Hills Autonomous District Council u Lasky Rymbai hajrong i yoh No Objection Certificate (NOC) kawi ka Coke Factory na ka JHADC kawa thmu wow chna ha Wah Deiñling kawa em ha East Jaiñtia Hills District.
Neiliang yong u Deputy CEM da ong u wa neiliang ka Council da e ko yaka NOC cha kani ka karkhana toh hajrong ka yurim wa da yoh bor ki naka Single Window Agency ka sorkar jylla wei da yoh bor leh naka Meghalaya State Pollution Control Board, kamtæ ka Council ym em hok ko wow kyntait.
Hawa yaklam hajrong i pyrchah ki paidbah lane wa da em næ ym em ka pynsñiaw paidbah namo ka Public Hearing heiyatoh wa katai ka karkhana, da ong u wa ki soo chnong hi yong kitai ki chnong wa marjan wa kynthup yaka chnong Umsatai, Ladwahwapung, Pynurkba waka Deinsatlang lyngba ki waheh chnong haka chithi da rai ki wow e laad ya kani ka Coke Plant wa em ha katai ka chnong, tangwa iwa phylla won wa kini ki soo chnong ha ki laad pathai khubor da pynsñiaw ki yei pyrchah ya kani ka Coke Plant.
Ini da pynpyrkhat ko yaka seiñ boi wa neibynta i myntoi samen, uwi ar ngut ki bor chnong da rai yabor du kattu katni ngut khlem da rai ki paidbah.
Ka seiñ da pynsñiaw ko yei pyrchah wa joor wei heijooh i por da kyrchaan ko yaki soo chnong wa pyrchah ya kani ka karkhana.
