U montri i chait i khiah ka jylla u AL Hek da pyntip u wa ynne ka sngi hadooh 4 waje i janmiet, waroh kiwa dang yoh COVID-19 da em ki 31 ngut.
Na kini ki 31 ngut, 26 ngut toh ki BSF ha East Khasi Hills, 1 u chipai (Armed Forces) ha Ri-Bhoi, 4 ngut ki bru paidbah kiwa 3 ngut na East Khasi Hills wa 1 ha Ri-Bhoi.
Neiliang u DHS u Dr. A. War da ong u wa ki bru paidbah kiwa dang yoh ha East Khasi toh kiwa liwan na Maharshtra (1) wa UP (1), wa 1 wa yabi ha NEIGRIHMS wa sumaar ya u BSF, ha Ri-Bhoi 1 toh wakreh ha khyrdop Entry Exit Point.
Ynne da em leh 2 ngut kiwa da chait ki chipai BSF kiwa em ha East Khasi Hills iwa da pynpoi ya kiwa chait cha ka 49 ngut.
Kamtæ waroh kiwa dang em ya uni u khñiang namo ki Active Case da em ki 326 ngut kiwa man kamni ha wah:
East Khasi Hills-288 ngut heiwa 222 ngut toh ki BSF, 14 ngut won kiwa na Army wa Assam Rifles wa 52 ngut ki bru paidbah.
Ri Bhoi-24
East Jaiñtia Hills-2
West Garo Hills-8
South Garo Hills-2
East Garo Hills-1
North Garo Hills-1
Waroh deilang wa kiwa dang em ya uni u khñiang kiwa 326 ngut, kiwa da chait 49 ngut wa kiwa yap 2 ngut da poi 377 ngut kiwa da yoh COVID-19.
Heiyatoh wa i leh yaka Random Sampling namo i chim nongmuna ha Umpling ynnin ka sngi ya ki 50 ngut, da chem ya ka wi wa man Positive deiwa leh daka Antigen Test Kit wei ym Test de daka RT-PCR tangwa ym pu em kheiñ yaka deilang waki 326 ngut hadooh wa pyndep chooh ya kiwa emkaam wei da kit leh cha Civil Hospital Shillong, COVID Ward.
Na kiwa dang em ya u COVID-19, 2 ngut toh kiwa chitom heiwa uwi wa 56 snem (BSF) dang emkaam u yaka kor Ventilator yow yarap riñ mynsien uwa chah sumaar ha NEIGRIHMS katwa uwi uwa chitom da pyndam noh wow pynemkaam Ventilator uwa 46 snem i rta uwa wan na baar jylla uwa chah sumaar hi ha NEIGRIHMS.
Na kiwa booddien nei lai khawai bia da dep wow Test ya 269 ngut wei 110 ngut man ki kiwa ym em chah ktah (Negative).
Ka NEIGRIHMS won da dep ko wow Test palat 100 ngut kiwa booddien hi ko.
Ha waroh kawi ka jylla da dep wow Test 25744 tylli ki Sample wei kiwa man Negative da em ki 24987 wei dang yang yaka Result ki 380 ngut.
Kiwa liwan won chapoh ka jylla da em ki waroh 22105 ngut.
