U Commissioner & Secretary ka chnat Health & Family Welfare Department ka sorkar Meghalaya ynne ka sngi da pynmih hukum u heiyatoh wow deiñ yaki Mask, i leh khooid yaki kti kamjooh wow yajngai uwi na uwi namo ka Social Distancing.
Heiyatoh wa i deiñ yaki Mask, dang man hi ko kawa ym hoi u dam manda mih napoh ki yung ki sem wei lada em hapoh yung leh toh u deiñ hi yaki Mask lada em yaka ka’oh lane i iñ doh.
Waroh ki bru wa em 2 snem chaneiñ hap ki wow deiñ Mask manda mih ki cha lait kamjooh heipor wa em ki cha jan ki bru wa ym toh kiwa na yung na sem yong ki.
I deiñ yaki Mask toh ym hoi u dam hawa em haki yalang kamjooh heipor wa lai yaw.
Yaki Mask toh u deiñ hawa em hapoh dukan, ki kari kamai, ki bus, wa kiwi ki yungkrehkaam paidbah hadooh ki yung dorbar chnong.
Toh u tymmoh yei ktien hawa ka’oh lane synrieh wei wow noh yaki that wa pynemkaam ha kini ki por.
Heijooh i por da ong leh wa ym toh iwa ye wow deiñ Mask waroh ki por wei chah hi wow looid yaki Mask ha kam kini ki por ha wah:
- Lada lai luti daka kari deiwa em samen hapoh kari, ym emkaam wow deiñ Mask. Tangwa lada sangeh wow yaklam bru lane hawa mih napoh kari, hap hi wow deiñ yaki Mask.
- Lada ha i lai luti daka kari wa ki bru naka jooh ka yung lane kiwa ya krehlang lada em wa looid yaki Mask yong ki, ym kheiñ wa da tyngkheiñ kyndon wa da booh neidaw wa toh wa man para chi yung wei kiwa da dep yachem chwa.
- Kiwa chong dai dukan lada em ki samen hapoh dukan, ye ki wow looid yaka Mask katwa ym pu em bru wa wan thied tiar.
- Hawa lai dei kjat ha ki sarok wa ym em bru lane duna bru, ye hi wow looid yaka Mask tangwa lada boon bru hap hi wow deiñ yaki Mask wei wow bood yaka Social Distancing.
- Ha ki thaw kreh toh u deiñ yaki Mask hawa em ki bru wa ym ya tipmit. Hoi hi wow looid yaki Mask lada em du para wakreh lang tangwa emkaam wow yajngai uwi ya uwi.
Ini ym em mut wa lada deiñ yaka Mask wa toh u mylliñ wow leh yaka Social Distancing lane wow dam u man kiwa lehkhooid.
Yaka hukum waroh kawi ye phi u puræ heini.