Shillong: Ka jylla Meghalaya da sakhi biang ko yei ku kiwa yoh COVID-19 wei hadooh i por 4 waje janmiet ynne ka sngi, kiwa dang em ya u Covid 19 da ku cha ka 367 ngut ha waroh kawi ka jylla. Katkam wa pyntip u DHS, ki wakreh ka chnat i chait i khiah ki wakreh ha ka khyrdop wa em ha Byrnihat, da em 6 ngut kiwa yoh ya u COVID-19.
U Dr. War u da pyntip u wa ynne ka sngi waroh kiwa dang yoh thymme da em ki 15 ngut, deiwa pyntip wa napyrdi kiwa yoh thymme, ha East Khasi Hills da em 7 ngut wa kynthup ya 4 ngut BSF wa 3 ngut ki bru paidbah. Katkam wa pyntip u DHS, na kini ki bru paidbah 2 ngut toh kiwa liwan na Assam wa 1 na Bihar. Kiwi kiwa yoh thymme ya u COVID-19 toh ha West Garo Hills 3 ngut, South West Garo Hills 1 wa 4 ngut na Ri-Bhoi District. Kini kiwa na Ri-Bhoi toh ki 3 ngut ki wakreh ka chnat i chait i khiah kiwa yabi na ki wakreh haka khyrdop kawa em ha Byrnihat, katwa 1 toh uwa yang ya uwa kjut ha Orthopedic Ward ha NEIGHRIMS.
U Dr. War da pyntip u wa na ki 367 ngut kiwa dang em ya u COVID-19, du ha East Khasi Hills da em ki 314 ngut, kitæ ki BSF 240 ngut, kiwi won ki chnat chipai 14 ngut wa ki bru paidbah da em ki 60 ngut. Ha Ri-Bhoi kiwa em ya u COVID-19 da em ki 35 ngut, East Jaiñtia Hills 2 ngut, West Garo Hills 11 ngut, South Garo Hills 2 ngut, South West Garo Hills, East Garo Hills wa North Garo Hills mar 1, katwa kiwa da chait da em ki 49 ngut wa 2 ngut kiwa yap.
Deiwa kheiñlang waroh nadooh kiwa dang em ya uni u khñiang, kiwa da chait wa kiwa yap da poi 418 ngut.
