Ka KSU-CEC da kyntu ko ya ki thaw puræ puthi hapoh ka jylla wow booh bhah ya kitu kiwa wan puræ na ki chnong wa jngai na ki thaw wa cha sor neidaw long i man ka pyrthai katni wa chem chitom ki wow lai thooh thaw puræ.
Ka seiñ da sñiawkhia ko wa hadien wa da pynbna yaka Result ka SSLC waka HSSLC wa kiwa lai thooh thaw thaw puræ daw chem chitom ki neidaw wa em ka khlam COVID-19 heiwa ym yoh de wow thooh thaw puræ cha baar ka jylla kamtæ waroh daw ya pyrchang ki du hapoh ka jylla donhi, kamtæ emkaam wow e laad chwa ya ki tre chnong tre thaw kiwa napoh ka jylla.
Ka seiñ da ong ko wa i leh yaka Online Admission daw booh ko yei eh ya kitu kiwa wan na jngai neidaw wa ym em biang ka Mobile Network, kiwa ym em biang ka Internet, ki Cyber Café ki wow ye u yarap leh yaka Online Admission.
Kamtæ ka seiñ da sñiaw ko wa emkaam wow chimkhia ya ini khamtam ya kitu kiwa wan na ki thaw wa em cha kdong cha chmiang.
