Hawa pynbna ya ki 21 ngut kiwa dang yoh COVID-19 ynne ka sngi hapoh ka jylla Meghalaya, neiliang ka sorkar da pyntip ko wa kiwa boon toh kiwa liwan na baar jylla.
Ha East Khasi Hills wa em 13 ngut kiwa dang yoh, kini kynthup ya 2 ngut ki CRPF kiwa liwan chuti, ki 9 ngut ki bru paidbah toh kiwa liwan na Bangalore, Hyderabad, Delhi, Assam wei uwi toh wa liwan na Bihar uwa lai bia.
Na ki 7 ngut kiwa dang yoh ha Ri-Bhoi, 2 ngut toh kiwa yajan wa yabi namo ki High Risk Contact wa ki wakreh haka khyrdop thaw psiah chapoh ka jylla.
Heiyatoh won ya uwi uwa na ka chnong wa em hajan Bhoirymbong uwa da lai phah sumaar ha CHC Bhoirymbong haka 10 tarik uni u bnai wei da chem wa em u ya u COVID-19, neiliang u symbood montri rangbah ka jylla u Prestone Tynsong da ong u wa uni u bru toh uwa psiah chapoh ka jylla haka 26-06-20 na Assam wei toh uwa khayi pateiñ uwa leh yaka Safeshop Business uwa man leh uwa sah hapoh ka jylla uwa da mih u napoh ka jylla ha chwa ka Lockdown wei da liwan u hadien ka Lockdown wei uni u bru toh uwa na Assam.
Hawa kylli, da ong u wa dang pynman yaka takit lada uni u bru psiah u chapoh ka jylla khlem bood yaki kyndon wei dang booddien leh yaki bru wa yachem uni u bru hadooh ka 10 tarik.
Neiliang u montri i chait i khiah u AL Hek da pyntip u wa waroh ki Sample wa da dep wow Test hadooh ynne ka sngi da em ki 28937 tylli, kiwa ym em chah ktah (Negative) da em 28167 tylli wei dang yang yaka Result ki 280 tylli.
Kiwa liwan chapoh ka jylla hadooh ynne ka sngi da em ki 23064 ngut.
Neiliang u Prestone da pynkynmoo u leh wa ya kiwa liwan chapoh ka jylla wa waroh ki khyrdop wow psiah chapoh ka jylla u khang ki nadooh wa kut ka 23 tarik hadooh wa kut ka 31 tarik uni u bnai kamtæ ym pdiang ya kiwa liwan. Da ong u leh wa ini ym em mut wa ym em de ki bru wow yang ha kini ki khyrdop wei daw em hi ki tangwa daw duna ki, wei daw pynlait du ya ki kari kitmar wa emkaam wow psiah wa kiwi de katkam wa da pynbna ini wa dep.
