Jowai: Ka Joint Action Forum (JAF) kawa em hapoh yong ka ki soo tylli ki seiñ kiwa kynthup ya ka Southern Border Youth Welfare Association (SBYWA), Jaiñtia Student Movement-Eastern Region (JSM-ER), Jaiñtia Youth Federation (JYF) waka North East Indigenous People Federation-South Eastern Border Region (NEIPF-SEBR), kawa emlang leh wa ki soo tylli ki chnong kiwa kynthup ya ka chnong Umsatai, Ladwahwapung, Deinsatlang wa Pyrurkba kiwa da yieñ skem ha ka yurim wym e laad wow chna ya ka Coke Factory næ ka karkhana thang rngaw mooyong ha Wah Deiñling East Jaiñtia Hills District.
Hawa yatoh wa ini i pyrchah, ynne ka sngi ha i yahkhmat u Chairman u Shnalad Rymbai, da lai yachem ya u Deputy CEM ka JHADC u Lasky Rymbai, wow pynsñiaw ya i dawa wow pynsangeh yei pynkreh ya kani ka karkhana ya kawa tip kam ka M/s Unique Industry, ha katai ka thaw wa tip kam ka Wah Deiñling.
Ki dkhot ka JAF ynne ka sngi da e ki ya ki kot kiwa yatoh wow pyrchah ha u Deputy CEM wow pynsñiaw yei pyrchah, heiwa neiliang yong oo heiyatoh wa ka NOC wa da yoh da katai ka karkhana, da ong u wa ka Council da hap ko wow e NOC hadien wa da biang ki kot ki sla na ki Waheh Chnong kiwa da e NOC, ym du cha ka kharkhana wot cha ki bru samen leh, hanla kattæ leh hajrong ini i dawa yong ka Forum, neiliang yong oo daw lai rah u ya ini i dawa cha ka EC yong ka Council.
Neiliang won u N. Talang da ong u wa ka JHADC ym ye ko wow e NOC kulmar cha kawon kawon ka karkhana khlem da em kawi won ka NOC kawa na u Chief Inspector of Boiler and Factories katkam ki kyndon yong ka State Pollution Control Board. Chooh chooh da ong u leh wa katkam i e bor yong u Director yong ka Commerce and Industries, Shillong toh wow booh ya kani ka karkhana ha ka chnong Wah Rang tangwa kamwa man kattæ da pynkreh wei sdang wow chna ha Wah Deiñling.
Ynne ka sngi da emlang leh u Secretary chnong Pynurkba u Hamlet Pdang, Ex-Waheh Chnong Pyrurkba u P. Dkhar, u S. Dkhar Secretary Umsatai wa kiwi.
