Jowai: I sangeh lai kreh wa khlem booh por ki wakreh yong ka JHADC iwa da sdang nadooh ka 16 tarik uni u bnai neidaw wym yoh tulop de ki la kamwa 8 bnai haroh, da wanrah ko yei thut ym du heiliang ki kaam ka JHADC wa ki paidbah, da sakhi leh wa da ktah haroh ko yei dur i dar yong ka imlang sahlang heiyatoh wa i khooid i suba.
Yeini i bynta da sakhi ha Iawthymme Ladthadlaboh Jowai, ha i thaw wa pynman yaw. Kani ka yaw toh kawa da pait wei pynlai daka Jaiñtia Hills Autonomous District Council, tangwa nadooh wa ki wakreh da sangeh lai kreh ki da yoo wa i tngit i jhep wa mih na kani ka yaw da neh ki chithaw don khlem em de wa pynkhooid, heiwa da lang i kylleiñ kani ka thaw pynman yaw wei da pynwit ko yei luti lai næ sarok.
Ye u ong wa ha kam kini ki por boon hi ki chong ki thaw ki dong ki chnat da yaleh bha ki u wanrah yei khooid i suba iwa nadooh i pran samen u bru, nadooh i yung hadooh cha lait khnang yow ye yakhun ya ka khlam COVID-19, neibhah wa katkam i hukum yong ka chnat i chait i khiah leh da ong wa i lehkhooid toh kawa kongsan tam wow yada na kani ka khlam.
Tangwa iwa phylla won wa ini da jia pyn hapoh ka chnong Jowai hi kawa man ka Headquarter yong ka West Jaiñtia Hills District.
Sa iwi leh wa toh kam ha kini ki por wa ka sorkar da pynmih ko ki hukum waphær waphær wa ki paidbah toh u bood næ ya krehlang ki, i boon kiwa wan yaw kamjooh kiwa chong yaw leh rap duna ki hawa wyrchaw waki por nachwa, kamjooh wot ki kari leh da rap duna ki nadooh wa pynlai da ki Odd & Even Number, katwa kamtæ ki jhep wa mih na kani ka yaw leh dang duna hanla ki wakreh da sangeh kreh ki nadooh ka 16 tarik.
