Ki Volunteer yong ka seiñ ki warep ka Hill Farmers Union (HFU) ha kini ki kajiak sngi ki da phah liwan noh ki ya kiwa boon ki bru kiwa thmu wow lai thied næ dai jhoor na ka yaw dailang wa em ha Parking Lot pyrchah ka Anjalee Cinema, Shillong neidaw wa em i chit kawa man palat 37 Degree Celsius deiwa thaw chit da ka Thermal Scanner.
Hawa ya klam wa u Commander Shangpliang, President HFU da pyntip u wa hadien wa ka Deputy Commissioner yong ka East Khasi Hills District da phah khang noh dang ini ya ka yaw dailang neibhah wym ye wow bood ya i yajngai uwi ya uwi (Social Distancing), ka seiñ da phah ko ya ki dkhot yong ka seiñ wow man ki kam ki Volunteer wow yarap wei wow sikai kamjooh wow phah ya ki paidbah warep, kiwa khayi wa kiwa thied wa toh u bood ryntih ya ka Social Distancing ha katai ka thaw pynman yaw.
U Shangpliang da pyntip u wa man sakhiat iwa eh wow pynbiang ya ka Social Distancing ha yaw dai yonglang tangwa hanla kattæ leh neiliang yong ki dkhot ka seiñ wa ki wakreh kiwa yang ha thaw pynyieñ kari da pyrchang ki katwa ye wow bood ryntih ya kani khnang wow lait na i chah khang biang ha ki bor District.
Kam chibynta wow yada leh na i poor uni u khñiang, da phah thaw chit da ka Thermal Scanner ya ki bru kiwa wan psiah ha katai ka yaw dailang wei ha kini ki sngi da pynuiñ biang wei ym chah ya kiwa boon ki bru neidaw wa em chit ki katkam wa chem hadien wa thaw chit.
U Commander Shangpliang da kyntu u ya ki warep, kiwa khayi wei kamjooh ya ki paidbah kiwa wan thied wow sñiawbha wow ya krehlang wa ka seiñ khamtam wa ka sorkar deiwa bood ryntih ya iwa phah yong ka sorkar khnang wow ye u yada na uni u khñiang kjut yow lait na i chah khang biang yong kani ka yaw dailang kawa toh ka pliang ja yong kiwa boon ki warep wa kiwa khayi leh kamjooh.
