Shillong: Katkam ka yukheiñ wa da yoh na ka chnat i chait i khiah, ynne ka sngi da em 8 ngut kiwa da chait na u COVID-19, waroh kiwa da chait hadooh ynne da em ki 78 ngut, katwa kiwa yoh thymme ya uni u khñiang da em ki 25 ngut hadooh i por 1 waje i sngi wei waroh kiwa dang em ya u COVID-19 ha ka jylla da em ki 433 ngut.
Hawa klam wa ki laad pathai khubor, u Director of Health Services (MI), u Dr. Aman War da pyntip u wa kiwa dang chait toh 4 ngut ki BSF, 2 ngut ki Assam Rifles, 1 wa wan khawai bia na Khanapara wa 1 wa wan na baar jylla.
Kiwa yoh thymme ya u COVID-19 toh 19 ngut ha East Khasi Hills wa kynthup ya 6 ngut ki BSF, kiwi ki chnat chipai 2 ngut, ha East Jaiñtia Hills 2 ngut wa na West Jaiñtia Hills 4 ngut. Da pyntip u wa ki 11 ngut kiwa yoh thymme na ki paidbah kynthup ya 4 ngut kiwa wan na Assam, na Arunachal Pradesh, Mizoram wa Manipur, 3 ngut toh ki wakreh ka NEIGHRIMS kiwa 2 ngut ki Nurse na Ortho Ward wa 1 wa saam baam ha ini i thaw.
U DHS da pyntip u wa na ki 433 ngut kiwa dang em ya uni u khñiang, du ha East Khasi Hills da em 366 ngut, ki BSF 269 wa kiwi ki bru 83 ngut wa na kiwi ki chnat chipai 14 ngut. Ha Ri-Bhoi kiwa em ya u khñiang COVID-19 toh 42 ngut, West Jaiñtia 5 ngut, East Jaiñtia 3 ngut, West Garo 12 ngut, South West Garo 1, South Garo 2, North Garo 1 wa East Garo 1.
Hawa kylli, u Dr. War da pyntip u wa ha East Jaiñtia Hills da chem ya kiwa em ya u COVID-19 hadien wa leh ya i Test yaki paidbah namo ka Random Testing ha yaw Khliehriat heiwa da chem wa em ki 2 ngut ki bru kiwa em ya u COVID-19 wa kynthup ya uwi u pulit wa kawi wa chongdai, katwa na West Jaiñtia Hills da chem ya ki 3 ngut hadien wa da pynman ya ka Random Test wei kini ki bru toh kiwa chongdai dukan ha Amlarem wa uwi toh uwa liwan na Assam.
U DHS da ong u wa da chem yei eh ya ka chnat i chait i khiah wow booddien ya ki bru kiwa yachem wa kiwa yoh COVID-19 neibhah wa da chem ya ki na ki thaw wa pynman yaw, deiwa ong leh wa ka chnat i chait i khiah daw hap ko wow pynkhlan wow booddien ya waroh wei lada emkaam daw leh kam ha Khanapara. Da ong u wa ya kiwa ha Amlarem, ka chnat i chait i khiah daw hap ko wow takit bha wow chem ya ki bru kiwa yachem neibhah wa kitai ki 3 ngut toh kiwa lai kylleiñ kylleiñ cha kiwi ki bynta yong ka thaaiñ.
Da pyntip u wa kini waroh da booh ha Corona Care Centre, deiwa pyntip leh wa da phah ya ki Deputy Commissioner wow pynbna Containment Zone ha ki thaw wa emkaam.
Ha iwi won i liang, u Dr. War da pyntip u leh wa yaka Lumpynngad (Block 2) da phah wow pynman kam ka Containment Zone, hadien wa 4 ngut da chem wa em ki ya u COVID-19, wei wa kini ki bru toh ki wym em ki dak ki chin wa chitom.
U DHS da ban joor biang u ya ki paidbah wa ym toh wow mih ki lada ym toh iwa emkaam, wei hawa mih leh toh u sñiawthooh neibhah wa ym ye wow tip wei ym ye wow ong uwon lane neiwon ye u psiah u khñiang kjut.
Ha i jooh i por u DHS da pyntip u leh wa ka Ministry of AYUSH yong ka sorkar pyrdi da pynpoi ko ya ki dawai Ayurvedic wa Homeopathic kiwa toh neibynta wow pynkhlan ya i doh i pran neibynta wow yada na kiwon kiwon ki khñiang kjut, wei ya kini ki dawai ye wow yoh khlem da emkaam wow su na ki PHC wa CHC ha kylleiñ ka jylla.
