U MLA ka Jowai u Wailadmiki Shylla, ynne ka sngi da yachem u wa u montri rangbah ka jylla u Conrad Sangma yow dawa naka sorkar yow pynman yaka Jowai kam ka Smart Town.
Haka chithi wa da e u ha u Conrad da ong u wa ka chnong Jowai kam ka Headquarter ka West Jaiñtia Hills District man ko kawa da chah ieh mylliñ da slem hanla man ko leh kawi na ki chnong wa heh wa kawa da rim bha ym du haka khayi pateiñ kamjooh haka khana pateiñ yong u warim.
Da ong u leh wa ki sarok man ki kiwa da sih, ki dooid ki wym biang, ki luti lai kjat ki wym biang, ki thaw pynyieñ kari ki wym biang, ym em paikhana ha ki thaw wa pynman yaw, i chna i tei kiwa em cha rood sarok kiwa ym em bood katkam ka aiñ iwa da wanrah yeiwa boon wa jia iwa sñiawsih,
Da ong u wa emkaam leh wow booh yaki CCTV kamjooh leh wow booh yaki Street Light, u pynmiat yei rukom pynlang yei jhep, u pynbha ya ki sarok wa em hapoh ka chnong yow pynsuk khamtam hawa em ki emkaam wa jhan wei wow booh leh yeiwa emkaam katkam ka juk wa katni hapoh ki yung krehkaam ka sorkar.
