Jowai: Kam chibynta u yakhun yaka khlam COVID-19 kawa nang ku haka District waka jylla hi waroh kawi, ki waheh chnong wa haap hapoh ka chatri yong ka Synjuk Waheh Shnong Jowai (SWSJ), haka yalang wada pynman ki ynnin ka sngi ha yung skur ka Ladthadlaboh Dorbar Chnong, da rai ki u wow thoh cha ka sorkar neibynta wow booh ya ki 3 tylli ki Check Point wei wow paitbniah deiwa Screen næ Test leh ya ki bru wa psiah chapoh Jowai, heijooh i por wow leh haroh ya ka Random Test ya ki paidbah yong ka chnong Jowai.
Ki 3 tylli ki Check Point næ thaw wow paitbniah ya ki bru wa psiah chapoh Jowai kynthup ha yingkieñ Myntdu (Jowai-Shillong Road), ha yingkieñ Tre-Iongriang (Jowai-Amlarem Road) wa ha Lad College KNGC (Jowai-Khliehriat Road).
Da rai haroh wa waroh ki Dorbar Chnong lyngba ki waheh chnong toh u booh ryntih ki ya ka Register yow chim pyrtuid yei mih i psiah kiwa chong chnong wei yow suk leh u booddien, heiwa kiwa chong chnong leh toh u pyntip ki cha u waheh chnong yei lai i wan yong ki.
Da rai ki leh wow ya mih yonglang neibynta u pait ya ar tylli ki yaw wa em hapoh Jowai, wei wow pynsñiawthooh paidbah haroh heiyatoh wa kammon u yada na u COVID-19.
Neitæ daw thoh ki cha u Deputy Commissioner ka West Jaiñtia Hills District heiyatoh waka hukum ya ki bru wa wankreh na kiwi won ki chnong kiwa haap hapoh ki Containment Area, wa toh u chong kset chwa ki hapoh yung hadien wa wan ki khamtam ya ki bru sorkar.
Heiyatoh wa ki dawai pynkhlan bor ya i doh i pran næ ka Immune System, da rai ki wow thoh cha u DM&HO ka West Jaiñtia Hills District neibynta u pynbiang leh haki artylli ki Urban Health Centre kiwa em hapoh Jowai wa kynthup ya ka Ladthadlaboh UPHC wa ka Chutwakhu UPHC.
Ha kani ka yalang wada chimbynta da ki waheh chnong waphær waphær ka Jowai da kyntu joor leh ya waroh ki waheh chnong ka Jowai wow ya krehlang ki heiyatoh wow pynkylla yei rukom im khnang yow ye u yada na kani ka khlam.
Ha kani ka yalang yong ka Synjuk Waheh Shnong Jowai da rai leh wow pynkrehkaam noh yaka Constituting Committee, wei da jied ya u A. Ñiangti President Synjuk Waheh Shnong Jowai kam u Chairman ka Committee, u L.D. Lakiang kam u Secretary ka Committee uwa man leh u Secretary Synjuk Waheh Shnong Jowai, wa kiwi won ki dkhot wa kynthup ya u A.T. Gatphoh, Waheh Chnong Caroline Colony, u R.R.Q Laloo Waheh Chnong Panaliar, u P. Syngkon Waheh Chnong Tpep Pale, u D. Pyrbot Waheh Chnong Chutwakhu wa u L. Pohktai Waheh Chnong Mynthong.
