Jowai: I pynneh pynsah yei miat yei yirngam ka Bei Rymaw wa ki soodong sookun toh i kamram wa hakhmat yong ki bru wa chong chnong waroh wa em ha kylleiñ ki thaw.
Kamtæ ka Rotary Club Jowai hajrong ini i thmu, ynne ka 25 tarik Naiynniaw da khut pynman ko yei thung dieñ ha Jowai Polytechnic Campus heiwa da chimbynta da ki dkhot ka Rotary Club Jowai, kiwa sikai wa ki khynnah puræ ka Jowai Polytechnic.
Chwa wow sdang i thung dieñ da em ka yalang hei pynlai u Rtn. S.K.Lato, MPHF President Rotary Club Jowai wei da e u leh ki kyntien yahkhmat ha jrong ka thong yong kani ka thung dieñ katwa u Rtn. Longda Bamon, Director Community Service ha ka bynta wa kut e u ki kyntien khublei.
Chooh chooh ha kani ka yalang da yoh leh yei klam na u Rtn. K. Pakma, Chairman Rotary International Environment Mission, Jowai wa na u Tapseng Marak, Lecturer Jowai Polytechnic heiwa kini ar ngut da klam ki heiyatoh wei emkaam i thung ya ki dieñ wei wow sumaar pynneh pynsah yei miat yirngam i man i long ka Bei Rymaw iwa man i myntoi wa khroo ya waroh lang.
