U Commissioner & Secretary ka chnat Health & Family Welfare Department ka sorkar Meghalaya da ong u wa da yoh yutip ka sorkar wa ki Doctor, ki Nurse wa kiwi ki wakreh ka chnat i chait i khiah kiwa sah ha ki Containment Zone da chah khang ki wow leh yei kaam yong ki, iwa da pynthut yei krehkaam ki Hospital wa krehkaam ki. Da ong u wa nalor u COVID-19, ki Hospital leh hap ki wow leh ya kiwi ki kaam wa yatoh waka yap ka im, u e yei sumaar sukher ya kiwi kiwa chitom iwa lada khang ya ki daw yah ko chei dooh yei mynsien bru.
Da ong u leh wa da em ki por wa ki wakreh ka chnat i chait i khiah wa da chah pait khmat chah kyntait ki, kamtæ ka sorkar da kyntu ko ya kiwa chong chnong wow em ki yei sñiawthooh wa ki wakreh ha ki kaam wa yatoh wa i chait i khiah da booh ki pyn yei mynsien yong ki hei maa yow yada yaki paidbah wei neini i daw ki paidbah toh u sñiawthooh ki wa ym hoi u dam ki yei kaam yong ki.
Chooh chooh da ong u wa da chim boon ki laad wow yada hapoh ki Hospital heiyatoh wa u COVID-19 wei ki wakreh man ki leh kiwa syndong bha hei rukom krehkaam ki nadooh i lai i wan yong ki yow lait ki nei maa.
Kamtæ da kyrpaad ya waroh wa ini i pynthut ya ki wakreh hei chait i khiah ym toh wow pteiñ i kamjooh wow khang yei liwan ki cha yung yong ki, kiwa da em chwa ka yukit wa khia bha ha ki.
