Hadien wa chem wa em ki bru wa chah ktah ha u khñiang COVID-19 ha Amlarem wa kiwi ki thaw kiwa da chem lyngba ka Random Sampling namo wow chim nongmuna (Sample) na ki thaw paidbah, da mih i sur na ki kattu katni ki bynta ki paidbah kiwa kwah ya kani ka jooh toh u leh ha Jowai wa khamtam ha Iawmusiang, Jowai neibhah wa boon ki bru wa wan yaw na kylleiñ ka Ri-loom Jaiñtia cha kani ka thaw.
Hawa yaklam wa u DC ka West Jaiñtia Hills, u Garod LNS Dykes da pyntip u wa da sdang ya ka Random Sampling ha Jowai kam ha Iawmusiang, Iawthymme wa ha ka Iawdailang namo ka Lay-by Market kawa em ha Ialong (ha ka tayaw wa ar uni u Naiynñiaw).
Da pyntip u leh wa na waroh ki 52 tylli ki nongmuna wa da chim da chem wa ym em u chah ktah ki ha uni u khñiang.
U Garod da pyntip u wa katkam ka rai ki bor District, da rai wow chim nongmuna na Jowai, neitæ hapoh Amlarem Sub-Division (ha Amlarem wa Dawki) wei neitæ won ha Thadlaskeiñ Block (ha Ummulong).
Da pyntip u wa ha ka bynta wa ar wa da leh yeini ha Amlarem da chem wa da em 3 ngut kiwa chah ktah ha uni u khñiang wei neini won daw leh yei jooh ha Ummulong.
Heiyatoh wow leh biang ya ka Random Sampling ha Jowai, u Garod da pyntip u wa hadien ka Ummulong daw chong pyrkhat biang wa ki bor ka chnat i chait i khiah wei katkam ka hukum ka sorkar daw leh yeiwa emkaam.
Da pynrap u leh wa katkam wa man katni dang boonkaam ki hei wow pyndep ya ka Contact Tracing yong ki bru kiwa da chah ktah ha uni u khñiang wei du hadien ini daw chong pyrkhat biang kammon wow leh chakhmat heiyatoh waka Random Testing.
