Shillong: Ka chnat Health and Family Welfare, ka sorkar Meghalaya, ynne ka 27 tarik da pyntip ko wa kiwa dang em ya u khñiang COVID-19 hadooh 3 waje i sngi da em ki 547 ngut. Wei kiwa boon toh ki bru ka BSF wa kiwa liwan na baar jylla.
Heiyatoh won wa i poor u khñiang khlam hapyrdi kiwa chong chnong namo ka Community Transmission, da ong wa daw ye wow ong wa da jia ini du hadien wym tip de neiwon cheiwon poor uni u khñiang, heiwa ha Meghalaya dang tip wow ong heiwon em kiwa yoh uni u khñiang wei kammon poor u deiwa leh bniah yei booddien namo ka Contact Tracing. Wei na ini i daw neiliang ki heh ka chnat i chait i khiah da ong ki wa ym em tang wow suba wa em ka Community Transmission.
Heiyatoh wa ki kattu katni kiwa chitom hei riñ mynsien namo ka Severe Acute Respiratory Infection (SARI) kiwa da chem ha Shillong (H G Roberts Hospital), kiwa em leh na Khliehriat, East Jaiñtia Hills wa Amlarem, West Jaiñtia Hills District kiwa da Test nyngkong wa man Positive namo kiwa yoh COVID-19 deiwa leh daka RT-PCR. Da pyntip wa hadien wa leh won daka Rapid Antigen Test deilang waka RT-PCR da chem wa ym em de em ki ya uni u khñiang.
Chooh chooh da ong wa waroh ki bru wa yachem yajan wa kini ki bru namo ki Primary Contacts da dep wow booddien wei wow Test yaki wei waroh ym em yoh COVID-19 ki namo man Negative. Wei dang em leh ki Result kiwa dang yang. Kamtæ da ong wa ym em itæ i poor uni u khñiang hapoh ki chnong ki thaw namo ka Community Transmission ha thaaiñ Khliehriat wa Amlarem.
Kiwa dang yoh ya u COVID-19 ynne hadooh 3 waje i sngi da em ki 36 ngut kiwa man kamni ha wah:
- East Khasi Hills- 32 (BSF 12, kiwi ki chnat chipai 1, wa 19 ngut ki bru paidbah)
- East Jaiñtia Hills- 02
- West Garo Hills- 01
- Ri Bhoi- 01
Na waroh kiwa dang em ya u COVID-19 kiwa em 547 ngut, ki BSF wa kiwi ki chnat chipai da em ki 285 ngut katwa ki bru paidbah da em ki 262 ngut.
Kiwa dang em ya u COVID-19 won ha ki District man ki kamni ha wah:
- East Khasi Hills- BSF (243), bru paidbah (174), kiwi ki chnat chipai (26), waroh 443
- West Khasi Hill- 3
- Ri Bhoi- Bru paidbah (43), ki bru chipai (9), waroh 52
- West Jaiñtia Hills- 10
- East Jaiñtia Hills- 15
- West Garo Hills- BSF (7), bru paidbah (9), waroh 16
- South West Garo Hills- 4
- South Garo Hills- 2
- East Garo Hill- 1
- North Garo Hills- 1
- South West Khasi Hills- 0
Kiwa chait da em ki waroh 186 ngut, kiwa yap 5 ngut wei deilang wa kiwa dang em ya uni u khñiang kiwa em 547 ngut, da poi waroh 738 ngut kiwa da dep yoh ya u COVID-19 hapoh Meghalaya.
