Kam chibynta wow yarap yaka chnong hei wow yakhun ya ka khlam COVID-19, ynne ka 27 tarik ha Dong Wahsder, Iongkaluh da chna yaka COVID-19 Committee khnang yow ye u pait u sylli ya i wan i psiah næ mih ki paidbah khamtam ya ki para jan chnong kiwa wan cha ka chnong.
Haka yalang wa pynlai da u Waheh Dong u Hambis Phawa, da pynsñiaw u ya i emkaam wow man kiwa husiar haka lai ka wan, wei kyntu u leh ya kiwa chong dong wow bood yaki kyndon ka sorkar khnang yow ye u kiar wow yada na u ni u khñiang uwa da wan hajan dwar yung yong i khamtam ha East Jaiñtia heiwa kat dang mih ki sngi dang ku kiwa yoh ya uni u khñiang, kamtæ emkaam u pynkhreh wow thoohlaad wow yada na uni u khñiang.
Neiliang u Evanphrangsngi Kyndait da ong u wa kiwa chong chnong, kiwa chong dong toh u ya krehlang ki yow ye u khang laad ya uni u khñiang deiwa sneiñ yaki khon ki kti kammon wow lehkhooid wow kiar na ki paralok wa najan næ wa na jngai, wei hawa mih cha yaw cha haat toh du neibynta wa emkaam u im.
Ha kani ka yalang da jeid ya u Lucas Dkhar wa u Deibormi Bamon u man ki kam kiwa yahkhmat ya kani ka Committee hapoh ka dong wei da kyntu ya kiwa chong dong nadooh kiwa mylla sngi, kiwa dai dukan, kiwa yah kari, kiwa lai thooh dawai dupon wow pyntip cha ka dong chwa u mih ki naka dong kamjooh leh da khang yaki paralok parajor kiwa na baar chnong wow psiah chapoh ka dong lait noh hawa emkaam ki i wym hoi de wow dam, wow ya ksohktilang waka sorkar nadooh ki janyung jansem, ki paralok parajor, ki para chnong para thaw kiwa najan chnong najan thaw wow yakhun pyrchah na kani ka khlam deiwa ngaitskem wa ha kawi ka sngi daw jop ya uni u khniang.
Ka yutip na u Secretary Dong Wahsder u Roitre Dkhar.
