Ka seiñ West Jaiñtia National Council (WJNC) da kyntu ko yaki bor wa hakhlieh wow sñiawbha ki u booh yaki Corona Check Gate ha luti Amlarem ha Chahtngit, ha Soomer By-pass wa ha yingkieñ Myntdu kawa haap hapoh West Jaiñtia Hills neidaw wa da poor smat u khñiang COVID-19.
Ka seiñ da ong ko leh wa hei yoo yong ka, kini ki thaw man ki kiwa emkaam wow booh ya kini ki Check Gate neibhah ki bru wa mih wa lai na kini ki thaw man ki kiwa maa na u khñiang COVID-19. Kamtæ khnang wow chngaaiñ ki paidbah yong ka West Jaiñtia, ka seiñ da ban joor ko ya ki bor wa toh u pait wow sylli wow booh smat noh ya kini ki Check Gate.
Ka seiñ da ong ko leh wa man ko kawa smat wow ya krehlang lada em ki dawa, pynkut ka kyrwoh na u Kitborlang Dkhar, President ka WJNC.
