Ka seiñ Khasi Jaiñtia National Union (KJNU) da thoh ki cha u DC ka West Jaiñtia Hills yow pynsñiaw yei pynthut i lai i wan ki kari heithaw wa em ka Weigh Bridge kamjooh i por ka Check Point ha Khliehtyrchi heiwa da khang yaka sarok deiwa booh da ki moo wa kamjooh ki tin psiang 3-4 tylli ha waroh arliang u sarok.
Ka seiñ da ong ko wa ha ki National Highway katkam ki kyndon wa ym toh u pynthut yei lai i wan ki kari.
Da ong leh wow pynthut yei lai i wan deiwa booh daki moo kamjooh ki tin psiang booh ko leh hei maa ya ki bru kiwa wan da ki kari wei toh u kyrriah noh syndon ya ini i rukum kah yaka sarok.
Ka seiñ da kyrpaad ko leh na u DC yow phah yaka chnat PWD yow chna pynmiat ya uni u sarok Jowai By-Pass (Thadlaskein hadooh Soomer) neidaw wa uni u sarok kattæ da man u uwa sih bha uwa em sa du ki thlu nadooh wa sdang hadooh wa kut.
